Madaxweynaha xilkiisu dhammaaday ee Maxamed C/llaahi Farmaajo oo markale doonaya in loo doorto xilka ayaa la sheegay inuu noqday musharaxa lacagta ugu badan u adeegsanaya Doorashada.
Xogta la helayo tan iyo xalay ololaha ka socda Vila Somalia ayaa sheegaya in kooxda Farmaajo ay culeys adag saartay xildhibaannada, isla markaana dooneyso in codadka xildhibaannada lacag ku bedeleyo, una hesho damaanad.
Qiimaha lacagta xildhibaanka loo qoondeeyay ee Musharax Farmaajo uu bixinayo ayaa lagu qiyaasay 100,000 ilaa 150,000 Dollar, sida ay sheegeen ilo xogogaal ah, waxaana xildhibaanka laga reebayaa caddeyn.
Mushariixinta kale ayaa lasoo weriyey inay bixiyeen lacago u dhaxeeya 30,000 ilaa 60,000 Dollar, waxaana ka mida dhammaan musharixiinta loo saadaalinayo inay u gudbaan wareegga labaad.
Bixinta iyo qaadashada laaluushka lagu iibsanayo codadka xildhibaannada ayaa sanadkan ka noqotay Baraha bulshada wax lagu faano oo taageerayaasha musharixiinta ay ku bogaadiyaan Musharixiinta ay taageersan yihiin.
Waxaa kaloo la yaab leh in Musharixiin ku ololeeynaya inay musuqmaasuqa la dagaalameen ama la dagaalami doonaan ay haddana lacag laaluush ah ku doonayaan inay xilka ugu sareeya dalka ku gaaraan.
Waxaa hore loo ogaaday in musharaxa ugu lacagta badan aanu wax guul ah ku gaari karin lacag bixin, laakiin ay lacagtu abuureyso inaad ka mid noqoto musharixiinta miisaamka leh ee la hadal hayo.
