Ra’iisal wasaarihii hore ee Soomaaliya Prof. Cali Maxamed Geedi, kana mid ahaa siyaasiyiinta sida weyn u taageersan madaxweyne Maxamed C/llaahi Farmaajo ayaa la sheegay inuu qaatay tallaabo cusub oo isbedel siyaasadeed ah.
Prof. Geedi ayaa la kulmay madaxweynayaashii hore ee Soomaaliya Shariif Sheekh Axmed iyo Xasan Sheekh Maxamuud oo hoggaaminaya Madasha Xisbiyada Qaran ee mucaaradka ah, waxaana uu caddeeyay inuu ku aragti yahay oo uu ka baxay siyaasadii uu hore ugu socday.
Arrintan ayaa timid, iyadoo dalku marayo xaalad kala guur ah, isla markaana khilaaf ka taagan yahay qaabka Doorashada 2020/2021, waxayna wararku sheegayaan inay Cali Geedi qanciyeen odayaal iyo waxgarad ka tirsan beeshiisa, laakiin wararka qaar ayaa sheegaya in heshiiska Cali Geedi uu la galay madaxweynayaashii hore uu ku saabsan yahay shirka Beelaha Mudullood.
Hore waxaa taageerada madaxweyne Farmaajo uga baxay oo dhinaca Ra’iisal wasaaraha iyo maamul Goboleedyada u janjeersaday guddoomiye ku xigeenkii labaad ee Golaha Shacabka Mahad Cabdalla Cawad oo hadda ku sugan Magaalada Dhuusamareeb.
