Waxaa goor dhoweyd Hotel ku yaala Xalane ka furmay shirkii Madaxda maamul Goboleedyada oo lagu waday inuu galabta furmo, kadib markii uu caqabad uga timid Madaxweynaha waqtiga ka dhammaday ee Maxamed C/llaahi Farmaajo.
Kulanka waxaa soo qabanqaabiyey Beesha Caalamka, wuxuuna ka dhashay is aragyo dhex maray madaxweynaha Galmudug Axmed Cabdi Kaariye (Qoorqoor) iyo madaxweynayaasha Jubbaland Axmed Maxamed Islaam iyo Puntland Siciid C/llaahi Deni, waxaana la qorsheeyay inuu shirku furmo galabta.
Saddexda Madaxweyne maamul Goboleed ee taageersan Farmaajo ayaa duhurnimadii tegay Teendhada iyadoo saacado badan ka dib dhacay, markii aroornimadii halkaasi iska xaadiriyey Maxamed Farmaajo, waxaana dood dhex martay uu Farmaajo culeys ku saaray, kana dalbaday inaysan ka qeybgelin shirka ay beesha Caalamka wado ee madaxda maamul Goboleedyada.
Madaxweynaha Galmudug ayaa diiday qorshaha Farmaajo, una sheegay Farmaajo inay soo ballanqaadeen ka qeybgalka shirka, suuragalna aysan ahayn inay ka baaqsadaan, taasoo keentay in markii danbe uu Farmaajo ogolaaday inay tagaan shirka, balse aysan shardi ka dhigaan inaysan qeyb ka noqon beesha Caalamka.
Waxaa dib u dhac ku yimid shirkii Madaxda maamul Goboleedyada oo dib loogu dhigay cadaadiska ka yimid Maxamed Farmaajo, wuxuuna ugu danbeyn caawa ka furmay hotel ku yaalla gudaha Xalane.
Furitaankii shirka waxaa lagu soo beegay shir jaraa’id oo uu qabtay Wasiirka Warfaafinta Xukuumadda Xilgaarsiinta oo sheegay arrin cusub oo lama filaan ah, taasoo ahayd in Maxamed Cabdullaahi Farmaajo uu ergo madaxweynayaal ah u diray Madaxweynayaasha Puntland iyo Jubaland si loogu soo qanciyo in ay ka soo qayb-galaan shirka Golaha Wadatashiga Qaran, egada loo dirayna ay kala yihii: Madaxwaynaha Galmudug, madaxwaynaha Koonfur Galbeed iyo madaxwaynaha Hirshabeele.
Inuu Farmaajo markii hore hor istaagay qabashada shir uu isagu ka maqan yahay, kadibna sheegto inuu isagu ergo u diray saddex ka mida madaxweynayaasha Maamul Goboleedyada waxay ka mid tahay dhacdooyin kusoo kordhay hab-dhaqanka Farmaajo oo dadaal aan hore loo adag ugu jira inuu is muujiyo xilligan ay sida adag u loolanayaan madaxweynayaasha Puntland iyo Jubbaland.
Farmaajo ayaa hore ula wareegay Teendhada Afisyoone oo Beesha Caalamka qoondeysay in lagu qabto shirka wadatashiga markii uu la tegay ciidamadiisa ilaalada u ah, wuxuuna maalintii afraad ku jarmaadaa Teendhada oo uu kula showro madaxda taagesrsan.
