Madaxweynayaasha Puntland iyo Jubbaland ayaa Madaxweyne Farmaajo uga guuleystay laba qodob oo halis ah siyaasadisa, kadib tanaasullo uu sameeyay 24-kii saac ee ugu danbeeyay, iyadoo aan si rasmi a loo furin shirkii la filayey inuu dhex maray saddexda dhinac.
Qorshaha Madaxtooyada Soomaaliya ayaa ahaa in Madaxweyne Maxamed C/llaahi Farmaajo Farmaajo kulan saddex geesood ah la yeesho Siciid C/llaahi Deni iyo Axmed Maxamed Islaam, isagoo kala doodaya waxa ay ka qabaan Heshiiska Doorashada ee Dhuusamareeb III, kadib markii ay tallooyinkooda soo jeediyaan, shir kale Madaxweyne Farmaajo isugu yeero madaxda saddex Maamul Goboleed ee saxiixay Heshiiskii Dhuusamareeb III, taasoo keeni lahayd inay iska hor yimaadaan maamul Goboleedyada.
Xaaladii waa is bedeshay, waxayna Siciid Deni iyo Axmed Madoobe la yimaadeen Qorshe sababay inay burburaan kaararkii siyaasadeed ee uu ciyaarayey Madaxweyne Farmaajo. Waxay marka hore diideen inuu furmo kulankii ay rabtay Madaxtooyada, waxayna la yimaadeen shuruudo ay ka mid yihiin: arrinta Gedo, madaxda maamul Goboleedyada kale.
Madaxweyne Farmaajo oo waqti ku socdo, lagana sugayo inu soo magacaabo Ra’iisal wasaare wuxuu aqbalay inuu wada-xaajood ka galo arrinta Gobolak Gedo iyo inuu casuumo madaxda Maamul Goboleedyada kale. Wuxuuna Qodobkan danbe ka dhigan yahay Shirkii Dhuusamareeb 3 oo dib loo qabanayo iyo in Madaxweyne Farmaajo uu fara-marnaan ka joogo wixii uu kasoo ansixiyey madaxda ka qeyb gashay shirkii Dhuusamareeb.
Haddii si kale loo dhigo waxaa halis ku jira labadii arrimood ee ugu waaweynaa mustaqbalka siyaasadda Madaxweyne Farmaajo oo kala ah; dib doorashadiisa oo mugdi ku jiro iyo dadaalkii uu bixiyey Gobolka Gedo oo natiijo la’aan ah. Heshiiskii DHuusamareeb ee madaxda ka maqan la sugi waayey, waxay natiijadiisii noqotay in toddobaadyo kadib lasoo bilaabo, iyadoo markan aanu waxba yeerin karin ee lagu dhegan yahay.
Inay Madaxweyne Siciid C/llaahi Deni iyo Axmed Madoobe si weyn u barteen, una daraaseeyeen Qorsheyaasha Madaxweyne Farmaajo waxaa muujinaya sida ay Beesha Caalamka uga faa’iideysteen iyo siduu u shaqeeyay qorshihii ay wateen oo hadda u nqoday guul siyaasadeed.
