Dad badan kuma baraarugsaneyn Kursiga HOP053 ee ay Baarlamaanka Federaalka ku leedahay Beesha uu kasoo jeedo Madaxweynaha muddo xileedkiisu dhammaaday ee Maxamed C/llaahi Farmaajo, waxayse barteen kadib wixii ka dhacay doorashadiisa iyo sidii loo maamulay.
Kursigan waxaa markii hore ku fadhiyey xildhibaan Faarax Cabdi Xasan, waxayna tallaabadii koowaad ee Farmaajo qaaday ay ahayd inuu ka dhigay qoonde haween, isagoo (60 sano ahaa kursi ay rag ku tartamaan), taasoo uu uga dan lahaa inuu gacan-yarihiisa C/llaahi Kullane kusoo baxo kursiga kale ee HOP040, kaasoo qoonde haween hore u ahaa, ayna ku fadhiday Nadiifo Faarax Jaamac.
Waxaa la shaaciyey in kursiga HOP053 uu yahay mid si cadaalad ah loogu tartamayo, taasina waxay keentay inuu soo jiitay haweenkii ugu badnaa Hal kursi isku sharxa, waxayna gaareen 7 Haween oo iyagoo rajo ka wada qaba, marayn dhammaan shuruudihii, kadibna qaatay shahaadadii musharxnimada.
Haweenka Musharixiinta ee kursigan waxay kala ahaayeen:
1- Reysal Qorane Abshir
2- Xaajiyo Axmed Gaas
3- Farxiyo Abdulahi Shiiqdoon
4- Ubax Abdi Ali
5- Zamzam Xasan Diiriye.
6-Fahmo Caabi Guureeye.
7- Hani Cabdi Gaas
Nasiibdarro mar kaliya ayey wax waiba is bedeleen, waxaana dib u dhac la geliyey kursigan, kadibna waxaa soo baxay qorshe uu wato Maxamed C/llaahi Farmaajo oo ah in kursiga lagu soo saaro Reysal Qorane Abshir oo ay si hoose isu xigaan.
Ma dhicin in gabdhihii musharixiinta ahaa la qanciyo, kharashkii iyo juhdigii ka baxay ee lagu qiyaamay in kursigu furan yahay lagala hadlo ama xitaa in si kale loo maareeyo, balse habeennimadii ayaa ergo cusub loo diyaariyey, kadibna subaxnimadii waxay ka war heleen inuu kursigii Farmaajo u xiray Reysal Qorane.
Musharxiiintii haweenka ahaa ee Kursiga HOP053 qaarkood waxaa loo geystay jirdil, waxaana xoog looga saaray hoolka doorashada ka dhaceysay ee magaalada Dhuusamareeb, kadibna waxaa kursigii kusoo baxday qoftii uu watayMaxamed Farmaajo ee Reysal Qorane.
Cabashada, oohinta iyo murugadii ay baraha bulshada la yimaadeen qaar ka mida haweenkii kursigan u tartami lahaa ee laga boobay, kuwaas oo qaraabo la ahaa Farmaajo waxay bulshada bareen jufada uu kasoo jeedo Maxamed C/llaahi Farmaajo, xaqiiqadiisa qofnimo iyo hab-dhaqankiisa qarsoonaa.
Inkastoo Doorashada dadban ee 2022 ay boob iska tahay oo dad badan ka sabreen, haddana uur-ku-taallada uu kursigan reebay ayaa ahayd in haweenkii ugu badnaa ay isku sharxeen markii rajo la geliyey inuu tartankiisu furan yahay, kadibna la khiyaameeyay oo awood loo adeegsaday, lagana boobay iyagoo taagan, laakiin dad badan ayuu indhaha u furay, kuwaasoo ku khaldanaa qofka uu yahay Maxamed C/llaahi Farmaajo.
