Waxaa shalay magaalada Muqdisho dib ugu soo laabtay inta badan xildhibaannadii la socday Madaxweynaha Galmudug ee magaalada Baydhaba u tegay xal u helidda cabashada maamulka K/Galbeed oo si weyn u eedeeyay Ra’isal wasaaraha iyo Beeshiisa.
Wafdigan ayaa markii ay tageen magaalada Baydhaba bilaabay kulamo ay la yeelanayaan madaxda K/Galbeed iyo xildhibaannada laga soo doortay degaankaasi, waxaana xogta la helay ay sheegeysaa in ay soo shaac baxday xaqiiqada ah inay wafdigu kala socdaan oo aanay isla socon.
Qorshaha tegista Baydhaba wuxuu markii hore ka yimid xildhibaanno kasoo jeeda Beesha Hawiye oo guddi ay sameysteen isku xilqaamay inay xal u raadiyaan qeylo dhaantkii kasoo yeertay C/casiis Lafta-gareen, balse markii ay xiriir la sameeyeen oo la isku iafgartay inay tagaan Baydhaba ayaa si lama filaan ah Lafta-gareen u dalbaday inuu wafdigooda soo hoggaamiyo Axmed Qoorqoor. (Halkan ka Akhriso Warbixinta)
Kadib raaligelin la isa siiyey labada dhinac, waxaa ujeedku ahaa in C/casiis Lafta-gareen lagu qanciyo inuu fasaxo Xildhibaannada Federaalka si loo siiyo Shahaadooyinkooda, ugana qeyb galaan Munaasabada dhaarta ee 14-ka Bishan April, laakiin qaar ka mida xubnaha Guddiga ayaa sheegay in Madaxweyne Qoorqoor uu si toos ah ula saftay dhinaca kale, dadaalkoodiina uu xagal daaciyay.
Madaxweynaha Lafta-gareen ayaa doonayey in loo fasaxo labada kursi ee muhiimka ah oo laga xayiray K/Galbeed oo midkood uu ku fadhiyey Guddoomiyihii hore ee Baarlamaanka Prof. Maxamed Sheekh Cusmaan (Jawaari) iyo Kursiga uu doonayey inuu u tartamo wasiirka Gaashaandhigga C/qaadir Maxamed Nuur.
Lafta-gareen wuxuu ogolaa in dib loo dhigo ama doorasho lagu celiyo kursiga ay kusoo baxday Sareedo Maxamed Cabdalla iyo kursiga kale ee Fahad Yaasiin kusoo baxay, laakiin arrintaas ayaa shaqeyn weyday.
Guddigan oo markii horeba aan cidna ka socon, isla markaana wax xiriir ah arrintan kala sameyn dhinacyada kale ee Ra’iisal wasaare Rooble iyo Guddiga FEIT ayaa fashil kala kulmay socdaalkoodii Baydhaba, waxayna dib ugu laabteen Muqdisho, halka uu Madaxweynaha Galmudug ku haray Magaalada Baydhaba.
