Wasaaradda Caafimaadka xukuumadda Soomaaliya ayaa xog dheeraad ah ka bixisay kiis ka mida labadii kiis ee ugu danbeeyay ee magaalada Muqdisho laga helo cuduruka Coronavirus.
Wasiir ku-xigeenka Wasaaradda caafimaadka xukuumadda Soomaaliya Maxamed Saciid C/llaahi oo la hadlay warbaahinta Muqdisho ayaa xaqiijiyey in labadii qof ee ay shaacisay Wasaaradda Caafimaadka dhowaan midkood uu ahaa qof ku dhex noolaa magaalada Muqdisho, kaasoo aan dibadda ka imaan, wuxuna walaac weyn ka muujiyey in cudurka COVD-19 ku dhex faafo shacabka.
Kiiska qofkan ayaa ka duwan kuwii ka horeeyay oo dhammaantood ahaa dad dibada ka yimid, laakiin, qofka ay wasaarradu shaacisay 3-dii April uu ka mid ahaa dadka caadiga ah ee Muqdisho ku nool, waxayna arrintan su’aalo badan ku abuurtay wasaaradda Caafimaadka.
“Bukaankii ugu dambeeyey ee laga helay cudurka waa Soomaali wax xiriir ah lama lahayn qof qabay cudurka, sidoo kale kama imaan dalka dibaddiisa, bulshada ayuuna ku dhex noolaa, Tani waxay ka dhigan tahay inuu fayrasku haatan ku jiro bulshada dhexdeeda, runtiina walaac badan ayey arintaas nagu abuurtay, maadaama dadkii isaga qaadsiiyey iyo kuwii uu la macaamilay ay weli bulshada ku dhex jiraan, siina qaadsiin karaan dad kale oo fara badan” ayuu yiri wasiir ku xigeenka oo aa sheegin in dadkaasi lala xiriiray ama tallaabo kale ay qaaday wasaaradda si loo karaantiilo.
