Xubin ka mida Guddiga Doorashada Banaadiriga ayaa ka baxay Guddigaasi, isagoo eedeyn culus u jeediyey Ra’iisal wasaaraha xukuumadda Xilgaarsiinta Maxamed Xuseen Rooble.
Cabdala Cumar Saalax ayaa shaaciyey inuu kasoo baxay Gudigii Doorashooyinka Banaadiriga, kadib markii uu arkay Caalaad darrada ka jirta Xafiiska Ra’iisul Wasaaraha oo uu sheegay inuu faragelin toos ah ku hayo doorashada kuraasta Beesha Banaadiriga.
Dr. Cabdalla Cumar ayaa sheegay in go’aan kasta oo Guddiga qaadan lahaa uu la wareegay Ra’iisal wasaaraha. “Guddiga oo dhan waxaa laga xukumaayey Xafiiska Ra’iisal wasaaraha. Warqad kasta oo soo baxda waxay kasoo baxeysay Xafiiska Ra’iisal wasaaraha. Mar kasta oo aan weydiino guddoomiyaha waxay na leedahay Ra’iisal wasarah ayaa yiri..” ayuu yiri Cabdalla Cumar.
Wuxuu caddeeyay inuu ka xun yahay dulmiga uu Rooble kula kacay Banaadiriga, isaguna maalin la weydiin doono, bannaankana uu ka taagan yahay dulmigaas. “Xuquuqda uu tuntay Rooble Alle ayaan ku deynay” ayuuna yiri.
