Golaha wasiirrada xukuumadda federaalka Soomaaliya kulankoodii toddobaadlaha ahaa ee maanta meel mariyay laba ka mida sharciyada ugu muhiimsan ee laga sugayey oo ay ku heysteen siyaasiyiinta mucaaradka iyo maamul Goboleedyada.
Golaha wasiirada waxay maanta ansixiyeen Hindise sharciyeedka Doorashooyinka oo ay soo diyaarisay Wasaaradda Arrimaha Gudaha, Federaalka iyo dib-u-heshiisiinta iyo Sharciga Xisbiyada Siyaasadda Dalka oo dib-u-eegis lagu sameeyay, waxaana arrintan soo dhoweeyay xildhibaano iyo siyaasiyiin mucaarad ah.
Sharciga Doorashooyinka oo ah kan ugu culus oo Dood weyn dhalin kara ayaa xukuumaddu sheegtay in lagu hirgelinayo doorashooyin xor iyo xalaal ah oo ka maran cabsi gelin iyo ceeb oo dhan, loona maamulay si madax bannaan, dhex-dhexaad ah, kaasoo qeexaya awoodaha Guddiga Doorashooyinka Qaranka.
Shirka golaha wasiirrada oo waxaa guddoomiyay Ra’iisul Wasaare Xasan Cali Khayre, waxayna arrimahan kasoo hormareen shirka Garowe ee madaxda dowladda iy o maamul Goboleedyada u furmi doona.
Labadan sharci ayaa lagu dhaliili jiray xukuumadda Ra’iisal wasaare Kheyre, waxaana hadda kadib doodu noqon doontaa in sharciyadaasi laga doodo, waxaana u baahan in la isku raaco sharciga Doorashooyinka oo madaxda maamul Goboleedyada awood badan ku leeyihiin.
