Xukuumadda Soomaaliya ayaa sheegtay in la baarayo fadeexad ka dhalatay video la baahiyay uu muujimayua jirdil ay ciidamada Nabadsugidda NISA ku sameynayaan maxbuus u xirnaa, arrintaas oo abuurtay ceeb weyn oo ciidamada Nabadsugidda iyo dowladda Federaalka soo gaartay.
Afhayeenka Wasaarada Amniga Soomaaliya C/kaamil Macalin Shukri oo shir jaraaid ku qabtay xarunta Wasaaradiisa ayaa sheegay in dowlada Soomaaliya ay guddi u saartay baaritaanka jir dil la sheegay in loo geystay muwaadin Soomaaliyeed kaasi oo lasoo dhigay baraha bulshada.
Afhayeenka ayaa sheegay in gudigan ay xubnihiisa ka mid yihiin Wasaarada Cadaalada ayna baarayaan waxa ka jira jirdilka la baahiyay, islamarkaana natiijada baaritaanka bulshada loosoo bandhigi doono.
“Dowladdu Guddi ayay u magacowday, waxayna gudigaan ka shaqeyn doonaan muuqaalka la baahiyey iyo waxa ka jira, baaritaanka wixii kasoo baxa waxaan la wadaagi doonaa bulshada Soomaaliyeed” C/kaamil Macalin Shukri.
Afhayeenka ayaa sidoo kale sheegay in shaqo joojin lagu sameeyey saraakiil ka tirsan waaxda baarista ee NISA kuwaas oo kasoo muuqda Video-ga la baahiyay.
Dhowaan ayay ahayd markii Wargeyska Washigton Post ee dalka Mareykanka kasoo baxa uu qormo dheer ka qoray in hay’adda NISA ay adeegsato caruur ay ka dhigatay farmuuqe loo adeegsado inay xubnaha ka tirsan Alshabaab aqoonsadaan, arrintan oo wargeysku sheegay in nolosha caruutraasi halis lagu geliyay, kana dhigan tahay dembi dagaal ayaa dowladda Federaalka ay sheegtay inay baareyso.
Wadani.com
