Xildhibaan Xuseen Carab Ciise oo ka mida Xubnaha Golaha Shacabka ee Baarlamaanka Federaalka Soomaaliya ayaa ku hanjabay inay isaga baxayaan dowladda Soomaaliya, haddii aan xal loo helin arrinta Somalia iyo Somaliland.
Isagoo ka hadlayey Baarlamaanka ayuu sheegay in meeshii ugu xumeyd ay marayaan wadahadalladii Somaliya iyo Somaliland, kadib markii dowladda hadda jirta ay ka gaabisay arrintaasi, isagoo ku hanjabay in xildhibaannada kasoo jeeda Somaliland in ay dib ugu laaban doonaan Gobalada ay matalaan ee Waqooyi, sida uu yiri.
“Meel Xun ayuu marayaa wadahadalada Soomaaliya iyo Soomaaliland waxaana loo baahan yahay in xalkeeda la helo ama annaga waxaan ku laaban doonaa Somaliland” ayuu yiri Xildhibaan Xuseen Carab Ciise oo sheegay inaysan Muqdisho u joogin shaqo.
Xildhibaan Xuseen Carab Ciise oo ah Guddoomiyaha Guddiga difaaca ee Golaha Shacabka, horena usoo noqday wasiir ayaa sheegay in Xildhibaanada kasoo jeeda degaanada Somaliland aysan ahayn shaqo-doon, balse ay u yimaadeen midaynta labada Gobal hadii aysan wax dadaal ah ka socon dhanka Koonfurtana ay dib ugu laabanayaan Hargeysa iyo dhulka Soomaalialnd.
“Halkaan uma imaanin shaqo, waxaan u nimid in la isu keeno labada Gobal hadii uusan jirin dadaalkaasna dib ayaa ugu laaban doonaa degaanadii aan ka nimid” ayuu yiri Xildhibaan Xuseen Carab Ciise.
