Dowladda Soomaaliya iyo Beesha Caalamka ayaa shir ay ku yeesheen Muqdisho kaga hadlay u diyaargarowga shirka London ee arrimaha Soomaaliya oo 11-ka May 2017 dhacaya.
Shirkan ayaa loo qabtay sidii loo dhageysan lahaa qorshaha dowladda federaalka iyo arrimaha dooneyso inay la tagto shirka London ee ugu muhiimsan, iyadooo shirka ka hor ay beesha caalamka dooneyso inay heshiis ka gaaraan dowladda federaalka qorshaha ay la tageyso London.
Arrimaha ay beesha caalamka ka heshiinayaan iyo dowladda federaalka ee ku jira qorshaha shirka London waxaa ka mida: Qorshaha Amniga, dib u habeynta dhaqaalaha iyo kaalmada abaaraha, waxa kaloo ku jira arrimaha siyaasadda ugu muhiimsan sida dib u eegista Dastuurka iyo gaarista doorasho qof iyo cod ah sanadka 2020.
Shirka oo ay dowladda Soomaaliya u metelayeen Ra’iisal wasaare ku xigeenka Mahdi Maxamed Guuleed, La-taliyaha ammaanka ee madaxweynaha Xuseen Macalin iyo C/raxmaan Yuusuf Ceynte wasiirkii hore ee qorsheynta ayaa lagu bogaadiyay qorshaha amniga Qaran ee ay ku heshiiyeen dowladda Soomaaliya iyo maamul goboleedyada.
Wakiilka Q/Midoobay ee Soomaaliya Michaeal Keating in shirka muhiim u ahaa sidii qorshe loo mideysan yahay ay beesha caalamka iyo dowladda Soomaaliya ula tegi lahaayeen shirka London.
Doorka wakiilada beesha caalamka ayaa loo arkaa mid aad u weyn oo saameyn ku leh qorshaha dowladda Soomaaliya ee shirka London.
Wadani.com
