Warar kala duwan ayaa kasoo baxaya dilka xildhibaan Cismaan Cilmi Boqorre oo Galabta lagu dilay magaalada Muqdisho, iyadoo Alshabab ay war kasoo saartay dilkiisa.
Dilkan xildhibaanka ayaa ka dhacay degmada Kaaraan ee magaalada Muqdisho oo uu deganaa, isagoo ahaa xildhibaanka kaliya ee xaafadaha Muqdisho degan, si xornimo ah u mari jiray magaalada Muqdisho, iasdoo aan cidna ka baqin.
Ragga weerarka lagu khaarijiyey fuliyey ayaa lagu sheegay inay ahaayeen laba rag ah oo bistoolado watay, waxaana gaari ay la socdeen ku waday nin darawal ah, iyadoo wararku sheegayaan in ciidamada amniga ay qabteen Gaariga falka dilka ah lagu fuliyey iyo darawalkii, iyadoo ay baxsadeen labadii dabley ee dilkiisa geystay.
War kasoo baxay Alshabaab ayaa lagu sheegay in dabley ka tirsan Xarakada Al-Shabaab ay ay howlgal qorsheysan ku dileen xildhibaan Cusmaan Cilmi Boqorre, waxaana warkaasi lagu sheegay in ciidamada howlgalka fuliyey ay si nabadgelyo ah uga soo dhaqaaqeen halka uu howlgalku ka dhacay.
Hay’adaha Amniga Dowladda Soomaaliya ayaan weli wax war ah kasoo saarin dilka xildhibaan Cismaan Cilmi Boqorre, waxaana madaxweyne Farmaajo uu faray hay’adaha amniga inay baaritaan ku sameeyeen sharciga hor keenaan dadkii ka danbeeyay dilka xildhibaanka.
