Wasiirka arrimaha dibadda Soomaaliya Yuusuf Garaad Cumar ayaa sheegay in saldhigga Milateriga ee Turkiga ka dhisay Soomaaliya dhowaan albaabada loo furi doono.
Wasiirka oo wareysi siiyay saxaafadda Turkiga ayaa laga soo  xigtay inuu sheegay in Saldhigga Milateri ee Turkiga uu yahay mid tababar oo muddo bilod gudahood lagu furi doono, isagoo intaas ku daray inuu saldhiga qeyb weyn oo muhiim ah ka qaadan doono diyaarinta iyo tababarka ciidamada Soomaaliya.
“Saldhigga tababarka ciidamada ee walaallaheen Turkiga ay ka dhiseen Soomaaliya, wuxuu noqon doonaa xaruntii ugu horeysay ee tababar heer sare ah lagu siiyo ciidamada Soomaaliya, sidaas ayuu ahmiyad noogu leeyahay..” ayuu yiri Wasiir Yuusuf oo saxaafadda Turkiga ay soo xigatay.
Wuxuu sheegay in Turkiga mashaariic dhowr ah ka fulisay Soomaaliya, sida u dhiska Garoonka Diyaaradaha Muqdisho, Dib u dhiska Wadooyinka, laba Isbitaal iyo Dugsiyo waxbarasho, iyadoo uu yiri in Turkiga ay tahay dowlad qey ka ah in Soomaaliya dib u soo laabato.
Saldhigga Milateri ee Turkiga ayaa dhowr jeer dib u dhac ku yimid, iyadoo hore loo qorsheeyay in la furo Bishii Janaayo 2017.
