Qabiilka Abgaal Cismaan oo ah qabiilka ugu badan dadka dega Muqdisho iyo nawaaxigeeda, waxa uu ka mid yahay qabaa’ilka Soomaalida kuwa tira ahaan ugu badan.
Abgaal waxaa ka dhashay General Daa’uud Cabdulle Xirsi, Xuseen Kulmiye Afrax, Salaad Gabeyre, Faarax Gololleey, Cali Mahdi, Prof. Cali Maxamed Geeddi, Nuur Cadde, Sh. Shariif Sh. Axmed, Madaxweyne Xasan Sh. Maxamuud iyo Guddoomiyaha Gobolka Banaadir Sh. Yuusuf (Maddaale).
Qabiilka waxaa lagu tiriyaa mid ka mid sh qabaa’ilka ugu hantida badan Soomaalida Koofureed, waxana laga heli karaa in ka badan 50 nin oo kiiba milyan doollar iyo ka badan uu haysto.
Waxaa qabiilka ka dhashay tobaneeyo ka mid ah ragga sheegtay inay sanadkaan isu soo taagayaan xilka madaxweynenimo ee Soomaaliya, waxanan dhihi karnaa dadka damaca madaxweyne ku jiro 70% waa Abgaal.
Waxa intaas dheer in Agbaal uu degi dhul aad u baaxad weyn oo fidsan min Shabeellaha Hoose, Banaadir, Shabeellaha Dhexe ilaa Galguduud.
Haddaba, ayada oo taasi ay jirto, ayaa waxa nasiibdarro ah in dhulka qabiilka intaas la’eg ay hareeyeen abaaro iyo dagaallo dad iyo duunyo halakeeyey oo aan la’isugu garaabin la’iskuna gacan qaban..
Dhulka Abgaal dego ee Galguduud, gebi ahaanba waxaa gacanta ku haya Shabaab, dadkii degganaana waxay noqdeen wax la laayey iyo wax qaxooti ku noqday deegaannada deriska la ah.
Sidoo kale, Gobolka Shabeellaha Dhexe oo magaalooyinka caanka ka ah ee Abgaal dego ay ka mid yihiin Aadan Yabaal, Mahaddaay, Warsheek, Jowhar iyo Balcad, meelo badan oo ka mid ah waxaa gacanta ku haya Shabaab oo dadkii degganaa way ka qaxeen, merlo kalena waxa loogu baaba’ay baad iyo biyo la’aan.
Maamulkii Shabaab, waxa dadka ugu darsantay abaar daba dheeraatay oo wixii dad iyo duunyo gacan Shabaab ka badbaaday leysay, ilaa iyo hadda cid gurmad u fidisay iyo cid hadal haysaana ma jirto.
Haddaba, malyuunneerrada Muqdisho madaxweynenimada malaayiinta doollar ugu bixinaya, dadkii dad ugu xigayna Shabaab iyo abaari isugu darmeen oo bakhtigu u xalaal yahay, sida ay ku dhacday yaa ii micnayn kara?
Sabriye Musse
[email protected]
Muqdisho, Soomaaliya
