Afhayeenka Madaxweynihii hore ee Soomaaliya Maxamed C/llaahi Farmaajo ayaa qoraal uu saaray ku shaaciyey in Cali yare Cali uu laga saaray kooxda Nabad iyo Nolol ee Farmaajo, wuxuuna iska fogeeyay afkaaraha uu dadka la wadaago.
Cabdirashiid Maxamad Xaashi Agaasimihii hore ee Warfaafinta Madaxtooyada, haddana gacanyare u ah Farmaajo ayaa qoraalkiisa ku sheegay in Cali yare Cali uu iskiis uga baxay kooxdooda Nabad iyo Nolol afkaartiisana ay tahay mid isaga ugaar ah.
Qoraalka hoos ka akhriso
“Waxaan cid walba oo ay khusayso la wadaagaynaa in Mudane Cali Cabdi Wardheere (Cali Yare) uu waqti hore go’aan isaga ka soo fuley oo uu si iskiis ah u go’aansaday in uu ka baxo Nabad iyo Nolol, go’aankaasna uu mar hore la wadaagay
hoggaanka Nabad iyo Nolol, wuxuuna doortay in uu la shaqeeyo dhinacyo kale oo siyaasadeed.
Sidaas darteed waxaan cid walba u xaqiijinaynaa in afkaarta uu la wadaago dadweynaha ay yihiin kuwo isaga u gaar ah oo wixii hada ka danbeeya aysan ahayn fikrado lagu matalo Nabad iyo Nolol.
Ugu danbayn, waxa uu hoggaamiyaha Nabad iyo Nolol Mudane Maxamed Cabdullaahi Farmaajo u mahad celinayaa dhammaan taageerayaasha Nabad iyo Nolol oo marwalba heegan u ah in ay adkeeyaan mabaadida aan u taaganahay ee ay ugu horayso wadaniyadda (Patriotism), isaga oo ku dhiiri galiyey in ay marwalba adkeeyaan midnimadooda”.
Dhammaad
Cabdirashiid Maxamed Xaashi
