Qorshe cusub oo lagu dhisayo maamul ay yeeshaan gobollada Hiiraan iyo Shabeelaha Dhexe oo ay hogaamineyso IGAD ayaa soo shaac baxay.
Qorshahan oo ku saleysan jadwal lagu dhisayo maamulkaasi ayaa waxaa soo diyaariyay urur Goboleedka IGAD oo hore ula wareegay dhismaha maamulka labada gobol oo muddo sanad ku dhowaad ah socon waayay.
Qorshaha IGAD oo dedgeg loo dhaqan gelinayo, wuxuu ka kooban yahay:
- In maamulka Hiiraan iyo Shabeelada Dhexe la dhiso ka hore 25-ka September.
- In la dhiso Guddi farsamo
- In degdeg loo soo xulo odayaasha dhaqanka beelaha labada gobol.
- In odayaasha dhaqanka ay soo qoraan xildhibaanada maamulka.
- Madaxweynaha iyo ku xigeenkiisa waxaa dooranaya xildhibaanada labada gobol
Dhowaan waxaa magaalada Muqdisho kulan ku yeeshay odayaasha dhaqanka beelaha Abgaal iyo Xawaadle oo la sheegay inay isku raaceen dedejinta dhismaha maamulka Gobollada Shabeelada Dhexe iyo Hiiraan.
Shirkan oo IGAD ka danbeysay ayaa ujeedkiisu ahaa in odayaasha Abgaal laga xaliyo dhibaato ay ka tabanayeen Ugaaska Beesha Xawaadle, waxayna IGAD hadda gacanta ku heysaa dhismaha Guddi sare oo labada gobol yeeshaan.
Guddiga sare ee maamul u sameynta Hiiraan/Dhexe ayaa waxaa ku jira qeybaha kala ah:
- IGAD
- Dowladda Federaalka
- UNSOM
- AMISOM
- Bulshada Rayidka labada gobol
Lama oga sida uu dib ugu furmi doono shirka maamul u sameynta labada Gobol, waxaase socda dadaallo dheeraad ah oo lagu doonayo in degdeg maamul loogu dhawaaqo.
Wadani.com
