Kooxda Alshabaab ayaa xaqiijisay in weerar lagu qaaday xero ciidan oo ku taalla degaanka Raaso oo Mareykanku sheegay inay ku dileen ugu yaraan 150 maleeshiyo Alshabaab ah oo tababar loo xirayay meel 194 km u jirta Muqdisho.
Afhayeenka Alshabaab ayaa xaqiijiyay in weerarku dhacay, kana dhacay meesha ay Mareykanku sheegeen, laakiin wuxuu u sheegay Aljazeera in Mareykanku aad uga badbadiyay tirada xeradaasi uga dhintay Alshabaab.
“Mareykanku waa riyoonayaan, tiro ciidan oo intaas la eg meel qura marna isugu ma geyn. Waan la soconaa xaaladda ammaan” ayuu yiri Afhayeenka howlgallada ee Alshabab C/casiis Abu Muscab oo intaas ku daray in weerarku xaqiiqo yahay inuu dhacay, kana dhacay halka uu Mareykanku sheegay balse tirada ay sheegayaan ay tahay been abuur sida uu yiri.
Afhayeenka Alshabaab ma bixin wax tiro ah oo kaga dhintay weerarka diyaaradaha Mareykanka ku qaadeen xerada Raaso, mana bixin faahfaahin kale.
Wasaaradda difaaca Mareykanka ee Pentagon-ka ayaa xalay sii deysay warka ku saabsan weerarka diyaaradaha dagaalka ku qaadeen xerada Alshabaab oo lagu dilay in ka badan 150 maleeshiyo. (AKHRI WARKA).
Wadani.com
