Annaga iyo Corona (Ra’yi)Sidii Corona u soo if baxay, waxaa na hareeyay isku dhax yaac sababay in aan wareerno, meel nalaka jiro aan garan weyno, oo aan shabkaxsannoWaxey ila tahay in afar qolo ay sabab u yihiin isku dhax yaacaas.
1. Madax iyo masuuliyiin aan qorshe laheyn oo go’aanadooda iyo tabartodu isla socon oo ay dabeyshu marba dhinac u rideyso.
2. War-fidiyeen iyo war-baahin aan xirfaddoodu wanaagsaneyn, oo la booda wax kasta oo ay maqlaan ama ku soo dhaca iyagoo aan u fiirsan waxa ka dhalan kara.
3. Dhakhaatiir iyo howlwadeenno caafimaad oo aad mooddo in ay la hadlaayaan dad kale, oo gudbinaaya farriimo aan dadka caadiga ahi si fiican u fahmi karin.
4. Wadaaddo la wareegay booskii dhakhaatiirta oo sheegaaya daawooyin aan wali cilmiga daawadu uusan wax ka dhihin, iyagoo ku laraaya afkaar diineed.
Intaas waxaa dheer, annaga oo ah ummad war ku nool ah, oo caqli-wadareed koodu ku dhisan yahay in wax walba la sheego, sida la rabo iyo ciddii la rabana loo sheego. Inta badanna waxaan ka hadalnaa waxa aan rabno ee kama hadalno waxa horteenna yaalla.
Nolosheenna waxaa sanadihii u dambeeyay aad u saameeyay waxa lagu faafiyo baraha bulshada, oo aan xadka laheyn, qof kastana u fudud inuu warkiisa gaarsiiyo Soomaalida adduunka oo dhan.
Xilliga la joogo ee uu Corona yahay waxa ugu weyn ee lagu mashquulsan yahay gudaha iyo dibaddaba, ayaa waxaa la is dhaafsanyaa warar iyo macluumaat been u badan oo abuuray khalkhal weyn.
Soomaalida kaliya kuma koobna khuraafaatka la xiriira Corona ee lagu faafinayo baraha bulshada. Waxaa qaati ka taagan ummadaha adduunka oo dhan, ha ahaadeen kuwa horumaray iyo kuwa dib u dhacay intaba.
Dhibka jira waxa uu yahay in dad badan oo la qiyaasayay in ay yihiin indhaha bulshada, xag aqooneed iyo xag garaad labdadba, iney u dhaqmayaan si qallafsan, oo aad mooddo iney dhufeysyo ku jiraan oo ay difaacanayaan wax ay is leeyihiin yaan la idinka qaadan, laakiin haddana aysan la wadaageynin cidna.
Dhibaatooyinka noocaan ah waxay bannaanka soo dhigeen caqligeenna runta ah iyo waxa xaqiiqda ah ee aan qarsaneyno, wanaag iyo xumaan intaba, laakiin waxaa soo badaneysa maalin walba in kuweenna dadaalaya ay ka qeylo dheer yihiin, kuwa war-xumo-tashiilka howl ka dhigtay.
Waxa ila habboon in dadka bulshada indhaha u ahi ay qaataan masuuliyaddooda, oo ay runta noo sheegaan haba kharaaraatee.
-Masuulow haddii aan go’aan qaadaneysid, keen go’aan maan-gal ah.
-Dhaktarow af aan aan garan karno nugula hadal.-
War-fidiyeenow wax hubso farriintaadana miisaan u yeel.-
Wadaadow adna farriinta diineed ku saleey waaqica bulshada.
W/Q: Cali Xalane
