Wararka naga soo gaaraya magaalada Muqdisho ayaa sheegaya in saaka dabley hubeysan ay toogasho ku dileen laba askari oo ka tirsan ciidamada dowladda hoose ee loo yaqaan Minishiibiyo .
Weerarka lagu dilay askarta ayaa ka dhacay Isgoyska Afarta Jardiin, dhinaca degmada Shibis ee magaalada Muqdisho, waxayna ahaayeen kuwa canshuurta. Dilka askartan ayaa waxaa geystay laba dabley ah oo bistoolado ku hubeysnaa, kuwaasoo ka baxsaday goobta.
Dad goobjoogayaal ahaa ayaa sheegay in askariga koowaad lagu furay rasaas darandoori ah, balse markii askarigii kale uu goobta ka cararray ayaa dabley kale isna goobta ku toogtay, iyadoo isgoyska lagu kala cararray, kadibna ay xireen ciidamada amniga.
Askarta Minishiibiyada ee la dilay ayaa la sheegay inay heysteen bistoolado balse aysan ahayn kuwo digtoon oo si degdeg ah loo khaarijiyey, waxayna ka mid yihiiin weerarrada khaarijinta ah ee ka dhaca caasimadda oo intooda badan ay sheegtaan Alshabaab.
