Askar ka tirsan Ciidamada Dowladda Soomaaliya ayaa saacadihii ugu dambeeyay dilal kala duwan ka geystay Muqdisho iyo degaanka Ceelasha Biyaha ee duleedka caasimadda.
Dilka hore ayaa xalay ka dhacay degmada Hodon agagaarka Isbitaal Digfeer, kadib markii askari lacag baad ah ka doonayey wiil Mootooyinka dhaqa oo Matoor u yaallay aaggaasi uu ka dalbaday inuu siiyo hal Doolar oo uu maalinle uga qaado, balse deyn ku ahaa, markii uu wiilka u sheegay inuusan heki karin, ayuuna askarigii xabbad madaxa ugu dhuftay wiilkaasi oo markii isbitaalka la geeyay geeriyooday.
Dhinaca kale waxa fal kale oo Dil ah uu maanta ka dhacay degaanka Ceelasha Biyaha, iyadoo askari ka tirsanaa ciidamada dowladda uu toogtay wiil dhallinyaro oo ahaa darawal Mooto Bajaaj.
Wiilka la dilay ayaa la sheegay inuu waday Mooto Bajaaj, laguna magacaabi jiray Yaxye shariif Daahir, waxayna wararku sheegayaan in askariga uu dilka u geystay iyo darawalka mootada uu muran dhex maray, iyadoo askarigiisa uu rasaas ku furay goobtana ku dilay wiilkaasi.
Ciidamada dowladda ka mida dhinacyada dilalka joogtada ah kula kaca dadka shacabka ah, waxaana saacadihii ugu danbeeyay ay Muqdisho iyo agagaarkeeda si xaqdarro ah ugu dileen laba wiil oo dhalinyaro ah oo shaqeysanayey.
Warar kala duwan oo soo baxaya ayaa waxaa ay sheegayaan in Akariga dilka u geystay wadihii Mooto bajaajta uu goobta ka baxsaday,halka wara kale ay sheegayaan in Ciidamada ku sugnaa halka uu dilka ka geystay ay qabteen.
Meydka wiilkii dhalinyarada ahaa ayaa waxaa goobta ka qaaday Ciidamada Dowladda iyo Ehelladiisa oo goobta tegay,waxaana la geeyay mid kamid ah xarumaha Caafimaad ee ku yaalla deegaanka Ceelasha Biyaha ee duleedka Magaalada Muqdisho.
Inta badan Ciidamada Dowladda ayaa waxaa ay dilal bareera ah u geystaan wadayaasha gaadiidka Mooto Bajaajta, kadib khilaaf soo kala dhex-galay,waxaana aad u yar askarta loo maxkamadeynayo dilalka darawalada Mootooyinka Bajaajta.
