Waxaa maanta magaalada Muqdisho ka dhacay kulan ay heshiis ku kala saxiixanayeen baarlamaanada Soomaaliya iyo kan Dalka Jabuuti,kaasi oo ku dhisan wadashaqeyn iyo walaaltinimo.
Kulanka waxaa goob joog ka ahaa Guddoomiyaha Golaha Shacabka Jamhuuriyadda Soomaaliya Federaalak Soomaaliya Mudane Maxmed Sheekh Cusmaan Jawaari, guddoomiye kuxigeenka 1aad ee Aqalka Sare ahna kusimaha guddoomiyaha Abshir Axmed Maxmed(Bukhaari), guddoomiyaha Baarlamaanka Dalka Jabuuti Maxamed Cali Xumud iyo xubno xildhibaano ah.
Heshiiskaasi waxaa u kala saxiixay Soomaaliya guuddooiye Jawaari iyo Abshir Bukhaari guddoomiye kuxigeenka Aqalka sare ahna kusimaha guddoomiyaha,halka Baarlamaanka Jabuutina uu u saxiixay Maxmed Cali Xumud.
Heshiiskan oo dhowr qodob ka kooban ayaa waxaa ka mida: Furista wadahadallo lagu xoojinayo wadashaqeynta labada Baarlamaan iyo sidoo kale sameynta guddiga saaxiibtinimada ee labada Baarlamaan. Xildhibaan Maxamed C/llaahi Xasan Nuux oo ah hab-dhowraha golaha shacabka ayaa sheegay in heshiiskan uu muhiimad gaar ah u leeyahay labada dal ee walaallaha ah.
Waxaa kulanka intii uu socday la isku la soo hadal qaadey muhiimadda ay leedahay wadashaqeynta iyo walaaltinimada baarlamaanada labada dal, iyadoo la ammaanay doorka Jabuuti ay ku leedahay taageerada Soomaaliya.
Guddoomiyaha Golaha Wakiilada Qaranka ee Jamhuuriyadda Jabuuti Mudane Maxamed Cali Xumad ayaa sheegay in qodobada heshiiskan ku qoran sida ugu dhaqsiyaha badan u hir gelin doonaan.isagoona bogaadiyay xoojinta xiriirka labada wadan.
Guddoomiyaha Golaha shacabka Soomaaliya Mudane Maxamed Sheekh Cusmaan Jawaari ayaa sheegay in dadka Soomaaliyeed iyo Dowladooda aysan marnaba iloobi doonin abaalkii ay u galeen shacabka reer jabuuti iyo dowladooda ,sidoo kalana Baarlamaanka Soomaaliya ay ka go’antahay xoojinta wada shaqeynta Baarlamaanka walaalaha Jabuuti.
