Madaxweyne QoorQoor ayaa codsaday inaan ka wada hadalno dhib guud iyo mid gaar ah oo horay innoo dhex yaallay.
Siyaasiyiga C/raxmaan C/shakuur Warsame ayaa ka hadlay kulan uu xalay isugu keenay isaga iyo saraakiil uu hore denbiyo ugu eedeyay oo hadda ay isla noqdeen xildhibaanno ka tirsan baarlamaanka Federaalka.
Kulanka C/raxmaan C/shakuur, C/llaahi Kulane iyo Saadaq Joon wuxuu dood badan ka abuuray baraha bulshada, iyagoo uu taageerayaal badan ku waayey, ayaa haddana qoraal yaab leh uu soo saaray wuxuu qiil ugu sameeyay kulankaasi oo uu sheegay inuu dalbaday Madaxweynaha Galmudug, isla markaan ay heshiis hordhac ah gaareen labada sarkaal ee xildhibaannada noqday,
Qoraalka C/raxmaan C/shakur hoos ka akhriso
Madaxweynaha Galmudug Axmad Cabdi Kaariye (QoorQoor) ayaa xalay xilli danbe iskugu kaaya keenay Saadaq Cumar (John) iyo C/llaahi Aadan Kulane oo labadu xildhibaanno uga soo baxay Galmudug. Kulanka oo aan la sii qorshaynin ayuu madaxweyne QoorQoor codsaday inaan ka wadahadalno dhib guud iyo mid gaar ah oo horay innoo dhexyaallay.
Is fahan iyo heshiis billow ah ayaan gaarnay. Horay ayaan dad dhib noo gaystay u cafinay, sababtoo ah siyaaddeena ka aargudasho iyo kala adkaansho ka mid maaha, laakiin marna caddaalada ka tegi mayno. Qofka wixii dhib loo gaysto waa cafin karaa, goorta uu doono, gaar ahaan marka loogu soo geed fariisto.
Tani maaha mid ka hor joogsanaysa ummadda Soomaaliyeed, gaar ahaan qofkii dhibane kale ah inuu cadaalad helo ama raadsado. Siyaasi walba waxaa maxkamad dadwayne u ah sooyaalkiisa dadku wada hayaan, isagayna dan u tahay inuu ka garaabo, gafkiisana cafis uga raadsado qof kasta oo wax ka tabanaysa. Haddii dalku yeesho maxkamado macno leh waxay innoo xallin doonaan waxyaalo badan mustaqbalka waana mid ah tahay in laga wada shaqeeyo sidii loo heli lahaa.
W/Q: C/raxman C/shakuur
