Senator C/raxmaan Maxamed Faroole oo madaxweyne ka soo noqday Puntland ayaa ka hadlay xaaladda siyaasadda dalka iyo wadahaladda Doorashada ee ka socda Muqdisho.
Faroole ayaa sheegay xoogaa rajo ah ay jirto shirka ka socda Afisyoone, wuxuuna si buuxda u taageeray mowqifka ay taagan yihiin Madaxweynayaasha Puntland Siciid C/llaahi Deni iyo Jubbaland Axmed Maxamed Islaam oo uu yiri waxay ku taagan yihiin sharci.
Senatoorka oo aan inta badan soo xaadirin fadhiyada Aqalka Sare ayaa saddexda maamul Goboleed ee taageersan Maxamed C/llaahi Farmaajo ku tilmaamay inaysan jirin meel ay ka taliyaan, ayna ku tiirsan yihiin ciidan iyo dhaqaale Muqdisho.
“Shanta maamul Goboleed ayaa maanta sharci ah.. Saddex maamul waa niman dhulkooda intiisa badan la heysto magaalooyinka ku hareerreysan waardiye laga hayo, dakhlina aan heli karin, anigu cudurdaar baan u hayaa, laakiin waxaan cudurdaar ugama hayo inay guddoonshaan oo cid ku raacaan federaal-diid… waxay ku sifeysan yihiin maahmaahdii Cismaan Yuusuf Keenidiid ee ahayd: Nin Mushaaro eexeynayaa waa miskiin dhabahe, mudeec waxa ka dhigay waa inuu maarmi waa’ yahay..” ayuu yiri C/raxmaan Faroole oo si cad u weerarray saddexda maamul Goboleed ee taageersan Farmaajo.
Wuxuu kaloo ka hadlay sharciyada dowladda isagoo yiri: “Cid maanta xil heysa oo sharciyad heysata maamul Goboleedyada yaa ka jirta; inta kale qaraar ayay ku joogaan inta doorasho laga gelayo, labada Aqal xitaa haddii la isku daro waa eber, waxna sooma saari karaan.., waxaanu nahay kursi-kululeeye”.
