Siyaasiga C/raxmaan C/shakuur Warsame oo ka mida Musharixiinta xilka Madaxweynaha ayaa sheegay in maalmaha u harsan madaxweynaha waqtigiisa dhammaaday ee Maxamed C/llaahi Farmaajo ay tirsan yihiin.
Qoraal uu soo diray ayuu ku sheegay in Farmaajo ay maanta u buuxsantay bil sharci darro ah, isla markaana uu doonayo inuu nolol siyaasadeed ka raadiyo xilkasnimada iyo biseylka shacabka iyo siyaasiyiinta mucaaradka ah.
“Mar walba wuxuu ku kacaa daandaansi gacan ka hadal ah, si looga jawaabo mid tiisa la mid ah. Ma aha nin u turaya taariikh hore, sababtoo ah dadaal kama soo gelin dib u dhiska dalka iyo dib u heshiisiinta dadka. Rajo kama laha in uu reebo raad wanaagsan, sababtuna waa in uusan qaban hawl wanaagsan oo uu beri ku faani karo.” ayuu yiri siyaasiga C/raxmaan C/shakuur.
Wuxuu farriintisa ku sheegay in Farmaajo uu doonayo inuu kala dooransiiyo dagaal sokeeya ama inuu xilka iska sii joogo, taasina ay soo dhammaan doonto sida uu yiri: “Wuxuu doonayaa in uu na kala dooransiiyo diktatooriyadiisa ama dirir sokeeye. Wuxuu abuurtay shabakad danaystayaal ah oo dadka iyo dalka u naxaynin. Waxaan ku diidaynaa is xakamayn, siyaasad xilkasnimo leh iyo iskacaabbin madani ah, waana hubaal in maalmaha u harsan ay tirsan yihiin”.
