Siyaasiga C/raxmaan C/Shakuur Warsame ayaa su’aal ka keenay xasuuqii 9-ka qof ee shacabka ah lagu laayey Koonfurta magaalada Gaalkacyo., kadib markii uu shalay cambaareeyay falkaasi.
Wuxuu ku dooday inay lagama maarmaan tahay in dareen iyo mowqif isku mid ah looga jawaabo fal kasta oo gurracan, wuxuuna sheegay in xildhibaano badan oo labada aqal ee Baarlamaanka ka tirsan iyo siyaasiyiin ay canbaarayeen xasuuqii Gaalkacyo ka dhacay, laakiin ay wax la yaab leh tahay inta badan xildhibaanada iyo siyaasiyiinta xasuuqa Gaalkacyo canbaareeyey inaysan juuq ka oran oo aysan soo hadal qaadin xasuuqii ay sanadkii hore Baydhabo ka gaysteen ciidamada dowlada iyo kuwa Itoobiyaanka ah.
“Farqiga u dhexeeya labada xasuuq waa in kii Baydhabo ka dhacay ay dowladu ka danbeysay oo lagu dhici waayey in la canbaareeyo, laakiin xasuuqii Gaalkacyo ka dhacay ma jirin cid gooni ah oo canbaarayntiisa looga cabsado ama looga weji dadbado, taas ayaana keentay in cid waliba canbaarayso, halkii xasuuqii Baydhabo, xildhibaano iyo siyaasiyiin tira yar ay ku dhiiradeen..” ayuu yiri xildhibaan C/raxmaan C/shakuur oo qoraalkan kala kulmay falcelin adag, iyadoo dad badan khalad u arkeen isbarbar dhigga labada dhacdo.
