Hoggaamiyaha xisbiga Wadajir C/raxmaan C/shakuur Warsame ayaa ka hor yimid dib u soo celinta taallooyinka waaweyn ee caasimadda Soomaaliya oo ay dayactir ku sameysay dowladda Somalia laguna soo celiyey halgamayaashii saarnaa, iyadoo uu shalay xariga ka jaray Madaxweynaha Soomaaliya madaxweyne Maxamed C/llaahi Farmaajo.
“Halgamayaasha waxaa lagu xusuutaa halganka ay u galeen xaqiijinta himilo ummadeed ama halista ay ka badbaadiyeen qaranka. Waxaa isku kay qaban waayey taaladii halgame dhintay (Sayid Maxamad) ayaan taagayaa, halgame noolna (Qalbi-dhagax) waan gacan gelinayaa…” ayuu yiri C/raxmaan C/shakuur oo si toos ah ula hadlayey madaxweyne Farmaajo.
Wuxuu sheegay in shacabka Soomaaliyeed ay madaxweynaha rumaysan lahaayeen, raad xusuusna ku reebi lahayd, haddii uu hortooda ka qiro in dhiibistii Qalbi-dhagax inay ahayd gabood-fal laga galay halganka iyo halgamayaasha uu maanta taalooyinkooda taagay.
