Daawo hore loo isticmaali jiray muddo dheer ayaa la ogaaday inay badbaadin karto bukaanada cudurka Covid-19 ee naftooda halista ku jirta, kadib baaritaan laga sameeyay dalka Ingiriiska.
Daawadan oo lagu magacaabo ‘Dexamethasone’ ayaa si weyn looga gartay inay badbaadin karo inta badan bukaanada Cudurka Coronavirus uu soo ritay, siiba kuwa xaalada adag ku jira ee neefsashadu ku adag tahay, waxaana tijaabadii la sameeyay ay ahayd mid rajo fiican leh.
Daawada ‘Dexamethasone’ ayaa ah mid qiimaheedu jaban yahay oo meel kasta laga heli karo, waxayna si weyn u kaalmeyn kartaa dadka cudurka uu waxyeelay inay soo kabtaan ayna ka badbaadaan ina u dhintaan cudurka Corona.
Waa tijaabadii ugu rajada fiicneyd dhammaan tijaabooyinkii lagu raadinayey Daawo hor istaagi karta cudurka Covid-19; iyadoo saynisyahannada caafimaadka ee UK ay sheegeen inay si buuxda u caawin karto 4/3 bukaannada xaaladahooda laga quustay ee ku neefsanaya qalabka loo yaqaanno ventilators-ka.
Waxay sidoo kale sheegeen inay cudurka ka dili karto inta badan dadka uu ugu dhacay sida adag. Cilmi-baareyaasha ayaa sheegay in haddii dawadan la isticmaali lahaa markii ugu horreysay ee uu fayraska gaaray UK ay badbaadin kari lahayd nolosha dad gaaraya 5,000 oo cudurka geeriyooday.
Tijaabada lagu sameeyay Daawadan oo ay fuliyeen hubaro ah oo ka tirsan Jaamacadda Oxford ayaa la siiyey ilaa 2,000 oo bukaannada isbitaallada ah oo la barbar dhigay 4,000 oo bukaan oo aan la siinin Dawada. Bukaannada uu ku xiran yahay qalabka neefsashada caawiya ee ventilators-ka waxay ka caawisay inay khatarta dhimashada ka yareyso 40%. Kuwa tuubada neefta Oxygen-ta lagu caawiyana waxay khatarta dhimashada ka yareysay 25% ilaa 20%.
Barfasoor Peter Horby, oo ah madaxa kooxda baaritaanka wadday , ayaa yiri: “Tani waa dawada kaliya ee ilaa hadda la xaqiijiyay inay yareyn karto heerka dhimashada – si baaxad leh ayeyna hoos ugu dhigeysaa. Waa guul weyn oo la gaaray.
Dawada dexamethasone waxaa tan iyo sanadihii 1960-meeyadii loo isticmaali jiray cudurro ay ka mid tahay neefta iyo qandhada darran, waxaana aad loogu ammaanay waxtarkeeda.
