Wararka laga helayo magaalada Ankara ee dalka Turkiga ayaa sheegaya in weerar hubeysan saaka lagu qaaday safaaradda Mareykanka ee magaaladaasi.
Dabley wadatay Gaari yar ayaa rasaas ooda uga qaaday dhismaha safaaradda Mareykanka ee magaalada Ankara, iyagoo markaas kadib goobta ka baxsaday, waxaana Booliska Turkiga uu shaaciyey inaysan jirin wax qasaare ah oo rasaastaasi geysatay, marka laga reebo rasaas haleeshay dhisme laga ilaaliyo safaaradda.
Safaaradda Mareykanka ee Ankara ayaa war ay kasoo saartay dhacdadan iyaduna sheegtay inuu dhacay weerarka, isla markaana aanay jirin wax qasaare ah oo ka dhashay, ayna socdaan baaritaan, iyadoo Booliska Turkiga uga mahad celisay sidii degdega ahayd ee uu arrintaasi uga jawaabay.
Booliska ayaa sheegay inay ku daba jiraan dadkii ka danbeeyay weerarka rasaasta lagu furay safaaradda Mareykanka oo watay Gaari yar, waxayna arrintan imaaneysa iyadoo uu sii xumaaday xiriirka dalalka Turkiga iyo Mareykanka.
