Dalka Ingiriiska ayaa maanta laga diiwaangeliyey tiradii ugu badneyd ee maalin qura cudurka Coronavirus ugu geeriyoota dalkaasi, markii la shaaciyey in 24-kii saac ee lasoo dhaafay ay cudurka u dhinteen 938 qof.
Geerida dadkani ayaa tirada dadka Covid-19 ugu dhintay UK waxay gaarsiisay 7097 qof, waxaana tirada cudurka sida ay hadda mareysaa 60,773 qof, iyadoo Ingiriiska uu ku jiro xilligii ugu darnaa ee faafitaanka cudurka Covid-19.
Dhinaca kale Ra’iisal wasaarihii dlakaasi Boris Johnson ayaa la sheegay inay xaaladiisa caafimaad kasoo reysay oo iminka laga saaray xaaladii degdegga ahayd ee uu ku jiray, waxaana la soo weriyey inuu kasoo kabanayo saameynta cudurka.
Dadka shalay ku dhintay UK waxaa ka mida dhaqtar muslim ah oo Ra’iisal wasaaraha UK ka codsaday in dhaqaatiirta iyo shaqaalaha caafimaadka la siiyo qalabka ay ku howlgeli lahaayeen si ay isaga difaacaan cudurka Coronavirus.
Abdul Mabud Chowdhury oo ahaa dhaqtar 53 sano jir ah, kana soo jeeda dalka Bangladesh ayaa noqonaya dhaqaatiir muslimiin ah oo UK ugu geeriyooday, iyagoo ku jira safka hore ee dagaal lagula jiro cudurka Coronavirus, wuxuuna ku geeriyooday isbitaal ku yaalla Bariga London.
