Bannaabaxayaashii careysnaa ayaa galay gudaha magaalada Safaaradda Mareykanka ee magaalada Baqdaad,kadib markii ay ku qamaameen, ayna ku guuleysteen isku day badan kadib.
Kumanaan dad ah oo ka careysan ayaa galay safaaradda, waxayna dab qabadsiiyeen derbiyada safaaradda, iyadoo safiirka Mareykanka iyo howlwadeennada safaaradda laga badbaadiyey oo laga saaray xarunta safaaradda.
Ra’iisal wasaaraha dalka Ciraaq ayaa ugu baaqay dadweynaha bannaanbaxaya inay ka baxaan safaaradda iyo aggaaarkeeda, wuxuuna caddeeyay in amniga diblomaasiyiinta dalkaasi jooga la ilaalin doono.
Dadweynaha bannaanbaxa ka wada safaaradda ayaa si weyn uga ka hor yimid duqeynta Mareykanka ku qaaday Kooxda Xisbullaahi ee Ciraaq oo lagu dilay 25 saraakiil iyo ciidamo isugu jira, waxaana arrintaasi ay kicisay dareen xoog leh oo dadka shiicada ah ay dalbanayaan in ciidamada Mareykanka laga saaro.
Wasiirada difaaca Ciraaq iyo arrimaha gudaha dalkaasi ayaa tegay xarunta safaaradda Mareykanka si ay xaaladda u qaboojiyaan, waxaana halkaasi ku qulqulay dadweyne kumanaan ruux ah, waxayna gubeen calankii Mareykanka, iyagoo gudaha u galay safaaradda.
Madaxweynaha Mareykanka Donald Trump ayaa ku eedeeyay dalka Iiraan inuu ka danbeeyay dilka ganacsade Mareykan ah iyo in la galo gudaha Safaaradda Mareykanka ee magaalada Baqdaad, wuxuuna ku hanjabay in lagula xisaabtami doono.
