Rasaas ayaa weli ka socota Hotelka Pearl Peach (Ex. Ocean View) ee Xeebta Liido, degmada C/casiis ee magaalada Muqdisho, kadib markii ay weerar ku galeen maleeshiyo ka tirsan Alshabaab.
Dableyda Alshabaab ayaa weli ka dhex dagaalameysa dhismaha Pearl Peach, waxaana la maqlayaa rasaas la is weydaarsanayo, halka ciidamada dowladda oo ay ku biireen kuwa NISA ay dagaal kula jiraan dableyda si howlgalka loo soo afjaro.
Weerarka Hotelka iyo Maqaayadda Pearl Peach (Ex. Ocean View) ayaa ku bilowday qaraxyo is-miidaamin ah, kadibna waxaa gudaha u galay ilaa 3 dabley oo hubeysan, sida ay baahisay Alshabaab dalbeyda ku jira Maqaayadda ayaa wareysiyo siiyay Warbaahinta Alshabaab, iyadoo sheegaya inay dad badan laayeen gudaha hotelka.
Dad badan ayaa laga soo badbaadiyay goobta, waxaana xilligan 5 saac kadib weerarka weli socda howlgalka, iyadoo uu jiro qasaare dhimasho iyo dhaawac leh. Gadiidka gurmadka degdega ayaa ku sugan goobta oo daabulaya dhaawacyada.
Agagaarka Goobta qaraxu ka dhacay waxaa ku sugan dadweyne badan oo raadinaya dad ka maqan, mana jirto faahfaahin oo ay bixiyeen Hay’adaha Amniga iyo maamulka Gobolka Banaadir.
