Danjiraha Soomaaliya u fadhiya dalka Nayjeeriya Jamaal Maxamed Barrow ayaa si weyn u dhaliilay dhaqdhaqaaqa ay magaalada Muqdisho ka wadaan safiiradda Ajnabiga ah.
Qoraal uu soo diray ayuu ku sheegay inay fowdo tahay kulamada is daba joogga ah ee safiirada shideheeya la yeelanyaan madxada Soomaalida iyadoo aan soo marin Wasaaradii arrimaha dibadda, taasoo dalalkooda aanay u ogolaadeen.
Danjire Jamaal Barrow ayaa ka mid ahaa saaxiibada madaxweyne Xasan Sheekh oo siyaasadda soo galay kadib xilligii uu madaxweynaha noqday 2012, wuxuu ka mid noqday Wasiir ka tirsan xukuumaddii Ra’isal wasaare Saacid, kadibna waxaa magacaabay 2015 safiirka Soomaaliya ee dalka South Africa.
Qoraalkiisa hoos ka Akhriso:
DALKA WAXA TAAGAN FOWDO DIBLOMAASIYADEED
Waxa yaab leh dhaqanka ay la yimadeen diblomaasiyiinta ajaanibta ah ee dalkeena ka hawlgala. Waxay nagu sameynoyaan waa wax marnaba dawladahooda u ogolaaneyn in diblomaasiyiinteenu dalalkooda ku sameeyaan. Tusaale, waxay dhex wareegaan xafiisyada dawladda heerakooda kala duwan iyagoo Wasaaradda Arrimaha Dibedda ka warqabin, taasoo ah hey’adda u xilsaaran la macaamilka diblomaasiyiinta ajaanibta ah. Ilaa haddana lama hayo cid yac tiraahdo oo nidaamka sax ah ku toosiya.
Arrimaha kaloo yaabka leh waxa weeyaan in baraha bulshada maalin kasta la soo dhigo sawiro diblomaasiyiin ajanabi ah oo la shirayo madaxda ugu sareysa dalka, lama yaqaano cidda balamahaas u fududeeysa. Waxa kaloo, nidaamka diblomaasiyadda baalmarsan in diblomaasi ajanabi ah dhambaal madaxdiisa ka sida si toos ah ugu gudbiyo madaxda ugu sareysa dalka, waa hawl Wasaaradda Arrimaha Dibedda iska leh, sida saxda ah waxay ahayd in cidda dhabaalka loo sido ay tiraahdo wasaaradda soo marsii.
Haddaba, si looga baxo fowdadan diblomaasiyadeed waxa waajib ah in Wasaaradda ay diyaariso xeer-nidaamiye hagaya diblomaasiyiinta dalka ka hawlgala, isla markaana ciddii ku xad-gudubtana lala xisaabtamo, sida ay sameeyaan dalalka adduunka oo dhan.
