Iyadoo xiisada labada dal ee India iyo Pakistan ay cirka isku shareertay ayay ciidamada Pakistan waxay shaaciyeen inay soo rideen laba diyaaradood oo dagaal oo India leedahay.
Afhayeenka ciidamada dalka Pakistan ayaa sheegay in mid ka mida diyaradaha dagaalka ee lag soo riday India ay ku dhacday gudaha dalka Pakistan, iyadoo la qabtay Duuliyihii waday oo baarashuut uga booday, ayna gacanta ku dhigeen duuliyaha India u dhashay.
India ayaan weli wax war ah kasoo saarin arrintan, weliba ma xaqiijin in diyaarado ay leedahay oo dagaal laga soo riday, waxayna ciidmada Cirka ee Pakistan ay saaka sheegeen inay duqeyn ka fuliyeen gudaha Kashmiirta ay xukunto India, taasoo jawaab u ahayd weerarkii India ee cirka ay shalay ku qaaday Gudaha Kashmiirta Pakistan.
Afhayeenka ciidamada Pakistan ayaa sheegay in laba duuliye oo India u dhashay ay qabteen oo midkood isbitaal loo dhigay dhaawacyo soo gaaray, wuxuuna intaas ku datay inaysan diyaar u ahayn dagaal, basle ay ka jawaabayeen gardarrada India.
Labada dal ee India iyo Pakistan ayaa qarka u saaran dagaal buuxa, kadib markii qof is-miidaamiyey uu qarax ku dilay ciidamo India ah oo gaaraya 43 askari, taasoo lagu eedeeyay inay ka danbeysay xoog ay Pakistan taageerto.
