Taliyaha ciidamada dowladda Somalia Axmed Jimcaale Cirfiid ayaa sheegay in howlgal ay ka fuliyeen ciidamada Somalia meel u dhow Bariire lagu dilay 10 qof oo rayid ah oo 3 ay caruur ahaayeen.
General Cirfiid ayaa sheegay in shilkaasi uu ahaa mid ku dhacay si kama’ ah. Taliye Cirfiid ayaa sheegay in shilkaasi uu dhacay kadib markii ciidamada dowladda ah iyo beeralay hubeysan oo ku sugnaa meel u dhow Bariire ay kala shakiyeen, kadibna ay rasaas bilaabtaya.
Taliyaha ayaa beeniyay war ka soo baxay saraakiil dowladda ka tirsan oo sheegay in howlgalkaasi lagu dilay 8 ka tirsan al-Shabaab.
“Waxaan xaqiijinayaa in dadka dhintay ay yihiin rayid, haatanna maydkoodii wuxuu yaalla cisbitaal Muqdisho ku yaalla” ayuu  yiri Taliye Cirfiid oo u warramay VOA-da.
Taliye Cirfiid ayaa VOA u sheegay inuu la kulmay madaxweynaha iyo Ra’isul-wasaaraha, oo uu sheegay inay ka xumaadeen dhimashada rayidka. Taliyaha ciidanka dowladda Soomaaliya ayaa sheegay in guddi xaqiiqo raadin ah loo saaray inay falkan soo baaraan.
DHAGEYSO TALIYAHA XOOGGA
