Tirada shaqaalaha Turkiga ee ku dhintay qaraxii is-miidaaminta ahaa ee ka dhacay inta u dhaxeysa degaannada Xaawo Cabdi iyo Lafoole ayaa korortay.
Laba muwaadin oo Turki ah ayaa ku dhintay Qaraxii maanta sida ay xaqiijisay wasaaradda Arrimaha dibadda Turkiga. Wasiirka Arrimaha Dibadda Turkiga Mevlüt Çavuşoğlu ayaa telefoonka kula hadlay qoysaska dadka ay ka dhinteen, isagoo uga tacsiyadeeyay geeridaasi. Wuxuu kaloo la kulmay milkiilaha shirkadda dhiseysa jidka Muqdisho iyo Afgooye.
Wasiirka Caafimaadka Turkiga Fahrettin Koca ayaa sheegay in muwaadiniinta Turkiga ee ku dhaawacmay qaraxa lagu daweynayo Isbitaalka Recep Tayyip Erdoğan Hospital (Digfeer) ee Muqdisho. Dhaawaca qaraxa ayaa gaaraya 14 qof oo saddex ka mida ay Turkish yihiin.
Dhinaca kale labada qof ee ku dhintay Qaraxa ayaa magacyadooda lagu kala sheegay: Erdinç Genç iyo Selami Aydoğdu, iyadoo dalkooda loo qaadi doono maalmaha soo socda si loogu aaso.
Alshabaab ayaa sheegatay qarax is-miidaaminta ah ee maanta lagu qaadayo shaqaalaha shirkadda Turkiga ee dhiseysa jidka Afgooye.
