Waxaa magaalada Dhuusamareeb ka bilaabanaya diiwaangelinta ciidamada Ahlu suna ku wareeejisay dowladda Somalia, iyadoo ay halkaasi ku sugan yihiin taliyeyaasha ciidamada qalabka sida iyo koox farsamo oo arrintaasi qaabilsan.
Waxaa magaalada Dhuusamareeb kulan yeeshay saraakiisha Wasaaradda Gaashaandhigga Soomaaliy iyo madaxda ciidamada Ahlu Sunna, iyadoo looga dooday qaabka diiwaangelinta ciidamada Ahlu suna iyo sidii loo qarameyn lahaa ciidankaasi.
Ra’iisal wasaare Kheyre ayaa qorshe culus u dejiyay kooxda Ahlu suna, kadib markii ay ogolaadeen inay ciidamadooda iyo hubkooda ku wareejiyaan dowladda Somalia, wuxuuna amray in si degdeg loo bilaabo diiwaangelinta iyo la wareegidda ciidamadaasi, iyadoo aan lagu kala tegi doonin inta howshaasi ka dhammaaneyso, wuxuuna magaalada Dhuusamareeb ugu yeeray saraakiisha wasaaradda Gaashaandhigga.
Ahlu suna ayaa hore heshiis ula gashay dowladii Xasan Sheekh, kaasoo ku saabsanaa in ciidamadooda ku wareejiyaan dowladda, kaasoo noqday heshiis aan suuragelin in la fuliyo, laakiin qorshaha Ra’iisal wasaare Kheyre ayaa u muuqda mid degdeg loo fulinayo, iyadoo uu maanta halkaasi gaaray wakiilka Midowga Afrika.
