Diyaarad rakaab ah iyo dadkii rakaabka ahaa ee la socday ayaa Caawa lagu xayiray Garoonka magaalada Wajeer, iyagoo kusii jeeday magaalada Nairobi.
Wararka ayaa sheegay in diyaradda AFRICAN AIRWAYS ee galabta ka duushay Garoonka Aadan Cadde ee magaalada Muqdisho ay Caawa ku xayiran tahay garoonka Wajeer, halkaasoo diyaaradaha ka taga Muqdisho lagu soo rogay in lagu baaro dhowaan, waxaana dhacday in baaritaankii diyaaradda iyo dadkii saarnaa uu waqti qaatay, halkaasina habeen noqotay, iyadoo diyaaradda loo sheegay inay duuli karin xilli habeen ah.
Qaar ka mida dadkii la socday diyaaradda oo ku dhow 90 ayaa sheegay inay caawa ku hoyanayaan Garoonka Wajeer, iyadoo Berri ay diyaaraddu u duuli doonto magaalada Nairobi, waxayna arrintan ka mid tahay cadaadis ay dowladda Kenya soo kordhisay kadib xiisada kala dhaxeysa dowladda Somalia.
Warar aan la xaqiijin ayaa sheegaya in diyaaradda ay la socdeen dad kala duwan oo ay ka mid yihiin xildhibaano iyo xubin ka mida Golaha wasiirada xukuumadda Somalia oo ka mid ahaa rakaabkii Muqdisho ka raacay.
