Waxaa magaalada Muqdisho maanta lagu qabtay doorashada qaaar ka mida kuraasta Golaha Shacabka ee Baarlamaanka Federaalka Soomaaliya.
Doorashada Golaha Shacabka ayaa isu bedeshay gacantaag aan lagu tartamın, iyadoo kursi kasta loo sharxayo qof loo xiray iyo musharax lagula ballamay inuu tartanka ka haro, kaasoo marka doorashadu bilaabato shaacinaya inuu isaga haray tartanka, kadibna si gacantaag ah ay ergada kalsooni ku siinayaan musharixii kursiga loo xiray.
Kuraasta marmar loo codeeyo ayaa sidoo kale ah kuwa la sii ogyahay natiijada oo inteeda badan ku dhammaata natiijo isku mida oo musharaxa la wato uu ku helayo codad gaaraya 70 ilaa 90 ergada kursiga.
Doorashada saddex kursi oo ka mida kuraasta Gobollada Waqooyi ee Somaiiland ayaa daqiiqado lagu soo soo saaray, kadib markii ay dhammaan tartanka isaga hareen musharixiinta loo yaqaan ‘Malxiiska’, waxaana natiijada ay noqotay sida soo socota:
Kursiga HOP#226 waxaa kusoo baxday Maryan Maxamed Ciise oo loo qaaday codka kalsoonida ay ku heshay 95 cod, halka 3 qof ka aamuseen, kadib markii ay tartanka ka hartay Musharax Khadiija Cali Warsame oo la tartami lahayd.
Kursiga HOP#218: waxaa kusoo baxay Dr. Maxamed Elmi Ibraahim oo cod gacantaag ah ku heay 92 ergay halka ay ka aamuseen 6 ergay, markii uu tartanka ka baxay Musharax Cabdiraxmaan Cismaan Xuseen oo la tartami lahaa.
Kursiga HOP#270 waxaa kusoo baxay Cabdiwahaab Cabdi Cumar oo cod gacantaag ah loo qaaday ku helay dhammaan ergadii soo xaadirtay ee 97-da ahayd, markii uu tartanka isaga hartay musharax Muna Axmed Diiriye oo la tartami lahayd.
