Dowladda Turkiga ayaa ku cadaadineysa xukuumadda Soomaaliya inay qaadato dad Soomaaiyeed oo ku xayiran dalka Garoomada dalka Turkiga.
Arrintan ayaa waxaa xalay shir Khadka Internet-ka ah ka yeeshay Guddiga uu guddoomiyaha u yahay Ra’iisal wasaaraha Soomaaliya Xasan Cali Kheyre ee qaabilsan Arrimaha ka hortagga Coronavirus; iyadoo aan la shaacin natiijadii kasoo baxday, waxaana laga cabsi laga qabaa in dadkaasi qaarkood ay qabi karaan cudurka Coronavirus.
Soomaalida ku xayiran dalka Turkiga ayaa la sheegay inay ku dhow yihiin 300 qof oo ah dad kala duwan oo isugu dad caafimaad u joogay, qaar arrimo kale u tegay, iyo qaar kale oo qurbe-joog ah oo ku xayirmay Turkiga markii dalalkii ay ku sii jeedeen ay xirteen garoomadooda.
Dowladda Turkiga ayaa hore xaalad adag ugala kulantay sidii dalka Aljeeriya ay ugu celin lahayd 1000 qof oo dalkaasi u dhashay oo ku xayirnaa Garoomada Diyaaradaha Turkiga, markii dowladda Aljeria ay diiday inay dadkaasi qaabisho.
Sidoo kale dowladda Turkiga ayaa Sacuudiga ku eedeysay in dadkii kasoo laabtay Cumrada Bishii Maarso aysan warbixin fiican ka siinin, iyadoo qaarkood laga helay Coronavirus.
Dowladda Soomaaliya oo cadaadis badan heysto isla markaana ku qasban inay dadkeeda dibadda ku xayiran qaadato ayaa haddana laga rabaa inay diyaariso goob lagu karaantiilo si aan dadka caadiga ah loogu sii dhex deynin.
