Dagaal dhex maray laba ciidan oo ka tirsan ciidamada dowladda ayaa Galabta maqribnimadii ka dhacay agagaarka Kuliyadda Jaalle Siyaad ee degmada Deyniile, magaalada Muqdisho.
Wararka ayaa sheegaya in labada ciidan ay kala ahaayeen Nabadsugidda iyo ciidamo milateri ah, waxaana iska hor imaadku ka dhacay bar ay ku sugan yihiin ciidamada amniga oo ay yimaadeen ciidamada milateri, kadibna halkaasi rasaas isku furay, tasoo dhalisay dhimasho iyo dhaawac.
Is rasaaseynta labada ciidan ayaa dhalisay dhimashada laba qof oo shacab oo kala ahaa Wiil dhalinyar oo mooto Bajaaj darawal ka ahaa iyo Gabar sanadkan ka qalin jebisay Dugsiyada sare oo magaceeda lagu sheegay Ismahaan Salaad Khaliif, waxaana ku dhaawacmay haweeney ganacsade ah, wiildhalinyaro ah iyo askari.
Waa markii labaad muddo 24 saacadood ah oo ciidamada dowladda ay ku dagaalamaan Muqidsho, waxaana shalay Ex-control afgooye ku dagaalamay labo Ciidan oo kala ah Milatari iyo Nabadsugid, ayna ku dhinteen 4 qof.
