Wararka laga helayo magaalada Muqdisho ayaa sheegay in koox hubeysan ay dil u geysteen oday nabadoon ah oo deganaa degmada Yaaqshiid ee Gobolka Banaadir.
Nabadoon Ibraahim Cariif Ibraahim oo ka mid ahaa Waxgaradka Degmada Yaaqshiid ayaa lagu dhex dilay Masjidka Sheekh Xasan Caddeee ku yaala Xaafadda Juungal ee degmada Yaaqshiid, kadib markii dabley hubeysan ay ugu galeen oo ay rasaas ku fureen.
Dilka Nabadoonka oo si ay uga naxeen dadkii masjidka ku sugnaa xilliga dilka dhacay ayaa keenay in lagu kala cararo masjidka, waxaana goobta ka baxsaday dableydii dilka geysatay, waxayna dadka degaanku sheegeen inuu nabadoonka ka mid ahaa ergada soo xushay xildhibaannada Baarlamaanka Federaalka ee lagu soo doortay magaalada Jowhar.
Xilliga dilka dhacay ayaa la sheegay inuu Nabadoonka ku dhex jiray Masjidka, isla markaana uu akhrisanayey Kitaab Qur’aan ah, ayna u soo galeen laba dabley ah oo dhalinyarro ah, halkaasina ku toogteen, isagoo masjidka ku dhintay.
Alshabaab ayaa inta badan fulisa dilalka qorsheysan ee noocan oo kale ah, waxayna hore dhowr jeer Masjid dhexdiisa ugu dileen dad kala duwan.
