Faahfaahin dheeraad ah ayaa laga helayaa Qarax ka dhacay magaalada Kismaayo, kaasoo ahaa Miino Gaari loogu xiray Sheekh caan ka ahaa degaanada Puntland oo ku sugnaa maalmahan magaalada Kismaayo.
Qaraxa ayaa ka dhacay isgoyska Somali Star, wuxuuna qabsaday Gaari halkaasi marayey oo uu la socday Sheekh Cabdinaasir Xaaji Axmed oo kamid ah culimada Soomaaliyeed ee caanka ah, kana soo jeeda Puntland.
Sheekha qaraxa lagu dilay ayaa la sheegay in dhowaan tegay magaalada Kismaayo, isagoo hore ugu noolaa magaalada Laascaanood ee gobolka Sool. Weli ma cadda ciddii ka danbeysay qaraxa iyo sababta loo dilay.
Maamulka Puntland ayaa shaaciyey in Sheekh Cabdinaasir Xaaji Axmed uu ku geeriyooday Qarax ka dhacay magaalada Kismaayo. War ka soo baxay Xafiiska Madaxweyne ku xigeenka Puntland ayaa lagu xaqiijiyay geerida marxuumka waxaana tacsi loogu diray dhammaan eheladii, Asxaabtii, bulshoweynta Gobolka Sool iyo ummada Soomaaliyeedba.
