Kadib magacaabidii Golaha wasiirada cusub ee Cumar C/rashiid oo muranka badani ka taagan yahay ayaa waxaa soo korortay sharci darro aan hore loo arag oo ah in wasiiro aan sharci ahayn oo kaliya magacaaban, qorshahoodiina aan la geyn Baarlamaanka weli, lana siinin kalsooni loo sameeyo xaflado lagu soo dhoweynayo iyadoo warbaahintii Qaranka ay baahineyso dhacdooyinkaasi.
Wasiirada falalkan ku kacay waa kuwii dib ugu soo noqday wasaaradihii ay hore u joogeen, ilaa iyo hadda waxaa tallaabadaasi sharciga ka baxsan ku dhaqaaqay laba wasaaradood oo shaqaalahoodii shirar soo dhoweyn ah u qabtaan wasiiradii u soo laabtay laakiin aan sharci ahaan weli la ansixin.
Wasaaradda Gaashaandhigga ayaa isla shalay shaqaalaheeda ay xaflad u sameeyeen wasiirka, wasiiru dowlaha iyo wasiir ku xigeenka soo laabtay, laakiin waxaa xaflada ku sugnaa Wasiiru dowlaha Maxamed Cali Xagaa. Sidoo kale waxaa jidkaas khaladka ah maanta ku dhaqaaqay  shaqaalaha wasaaradda warfaafinta oo iyana xaflad weyn u sameeyay wasiirkooda iyo wasiir ku xigeenkooda dib loo magacaabay, waxaana nasiib darro xafladaas kasoo dhex muuqday wasiirkii iyo kuxigeenkiisa.
Warbaahinta Qaranka ayaa sidoo kale qeyb ka ah khaladaadka weyn ee ay ku dhaceen shaqaalaha iyo wasiiradooda degdeggu ku dhacay, waxaadna moodaa in khadkii Warbaahinta Qaranka looga bartay ee ah inay aragtiyada kala duwan ee dowlada dhexdeeda ay baahiso ay iminka meesha kasii baxeyso.
Warbaahinta Qaranka ayaa tan iyo markii uu wasiirka warfaafinta ahaa Daahir Maxamuud Geelle ku shaqeyneysay qaab xilkasnimo ah oo u dhaxeysay kala aragti duwanaanshaha dowladda dhexdeeda, waxayna khadkaas dimoqraadiyadda ku dhisan ku socotay ilaa khilaafkii ugu danbeeyay ee lagu riday xukuumadii C/weli Sheekh. Waxaase dhici jirtay in mararka qaarkood faragelin ku sameyso madaxtooyada sida in laga joojiyo wararka uu baahiyo guddoomiyaha Maxkamadda sare.
Xilliyadan danbe sidii loo dhisay xukuumadda Cumar C/rashiid waxaa soo if baxeysa in Warbaahinta Qaranka ay u shaqeyn doonto qaab u dhow sidii warbaahintii Kacaanka, mana muuqato in ay dulqaad u leedahay baahinta xitaa wararka xildhibaanada ka horjeeda xukuumada cusub ee aan weli nuurka arkin.
Wadani.com
Muqdisho
[ad name=”HTML”]
