Faarax Sheekh C/qaadir oo ah saaxiibka ugu weyn ee madaxweyne Xasan Sheekh, soona qabtay xilalka wasiirada Garsoorka iyo Dastuurka ayaa la sheegay inuu kala dooranayo xilkii uu ka qaadan lahaa 2-sano ee soo socota dowladda Federaalka kadib laba sano oo uu ku bixiyay wasiirnimo iyo ololeyaal lagu riday laba Ra’iisal wasaare.
Warar ku dhodhow kooxda madaxweynaha ayaa sheegaya in Faarax Sheekh C/qaadir go’aan ka gaari doono laba jago tii uu ka qaadan lahaa xukuumadda cusub ama Baarlamaanka, kuwaasoo kala ah:
1. WASIIRKA GARSOORKA IYO ARRIMAHA DIINTA, AHNA RA’IISAL WASAARE KU XIGEEN
Jagadan oo markii hore lagula taliyay inuu saaxiibada madaxweynaha u qabto, waxaa ujeedku yahay inuu howsha ra’iisal wasaaraha la wareego, kana maamulo daaha gadaashiisa, laakiin waxaa arrintan culeys ku keenaya iyadoo la sameynayo saddex Ra’iisal wasaare ku xigeen. jagadan waa mid qorsheysan oo ay door bidayaan saaxiibada madaxweynaha.
2. GUDDOOMIYE KU XIGEENKA KOOWAAD EE BAARLAMAANKA
Jagadan waa tan labaad ee Faarax Sheekh C/qaadir qorsheynayo inuu qabto, waxayna ku xiran tahay Jeylaani Nuur Iikar oo hadda haya xilkan, waxaa loogu bedeli doonaa jago wasiir isagoo iska casili doona jagada guddoomiye ku xigeenka koowaad ee Baarlamaanka, sidoo kale waxaa loogu dari doonaa sida qorshuhu yahay Nus Milyan Doolar.
Qorshahan wuxuu khalkhal gelin karaa Baarlamaanka, waxaana dhici karta in Beesha Shanaad iyo xildhibaanada ku kacsan Madaxweynaha iyo Faarax ay si weyn uga hor yimaadaan, waxayna u badan tahay in arrintaan ku adag tahay oo ay dib ugu dhigi doonaan ilaa dhammaadka 2015 markaas oo si weyn kooxdu ugu baahan tahay inay guddoonka Baarlamaanka awood ku yeelato.
Arrimahan oo dhami waxay kala caddaan doonaan marka la guda galo Magacaabidda xukuumadda cusub oo qeyb ka mida la sii qoray, waxaana la saadaalinayaa inuu xukuumadda ku soo laaban doono Faarax Sheekh C/qaadir isagoo ka awood badan sidii hore.
Wadani.com
Muqdisho
[ad name=”HTML”]
