Taliyaha Hay’adda Nabad-Sugida iyo Sirdoonka Qaranka Fahad Yaasin Xaaji Dahir ayaa jawaab ay shuruud ku xiran tahay u diray Ra’iisal wasaare Maxamed Xuseen Rooble.
Qoraal jawaab ahaa oo Fahad Yaasiin u diray Rooble ayuu ku dalbaday in si uu warbixin uga bixiyo Kiiska Ikraan Tahliil Faarax uu doonayo inay kulan isugu yimaadaan Golaha Amniga Qaranka oo ay ka mid yihiin madaxweynaha xilka ka dhammaaday, taliyeyaasha ciidamada iyo Wasiirada Amniga, Gaashaandhigga iyo arrimaha gudaha.
Fahad Yaasiin ayaa qoraalkiisa ku yiri “Anigoo fulinayna amarkaaga, maankana ku hayna xasaasiyadda kiiska Sarkaal Ikraan Taliil oo noqotay mid heer Qaran, gudanayna waajibka naga saaran amniga qaranka, fahansanna in dhacdadaan ay si toosa iyo si dadban u khuseyso xafiisyo iyo hay’ado kale duwan oo dowladda ka wada tirsan, xaqna u leh inay ogaadaan xaqiiqda dhacdadaan iyo xogta ay xambaarsan tahay warbixitaan aad naga dalbatay, ayaan waxaan si sharaf leh kaaga codsanaynaa in aan warbixintaan ka horjeedino golaha Amniga Qaranka oo wada dhan, oo ay xubno ka yihiin hay’addaha iyo xafiisyada ay arrintan khuseyso”
Fahad Yaasiin ayaa qoraalkiisa sii raaciyay: “Hay’adda Nabadsugida iyo Sirdoonka Qaranku waxay codsi rasmi ah u dirtay madaxweynaha Jamhuuriga Federaalka Soomaaliya inuu fursad noo siiyo qabsoomidda shirka Golaha Amniga Qaranka, maadaama uu yahay guddoomiyaha Golaha Amniga Qaranka, iyo Taliyaha Ciidamada Qalabbka Sida.”
Jawaabta uu Fahad yaasiin bixiyey ee uu uga hortegayo amarkii Ra’iisul Wasaare Maxamed Xuseen Rooble ee soo baxay shaley oo ahaa inuu 48 saac ku keeno warbixin dhameystiran oo ku saabsan dilkii Ikraam Tahliil ayaa loo arkaa mid uu doonayo inuu mas’uuliyadda uga wareejiyo Ra’iisal wasaaraha, kuna kasbado waqtiga.
Guddiga Amniga Qaranka ayaan muddo sanad ku dhow wax shir ah isugu imaan, waana guddi howlgab noqday mar hore, waxayna arrintan mar kale iska hor keeneysaa Ra’iisal wasaaraha iyo Agaasimaha NISA.
Maxamed C/llaahi Farmaajo iyo Fahad Yaasiin ayaa la sheegay inay arrintan ka wadahadleen oo meel uga soo wada jeedaan tallaabooyinka la filayo inuu qaado Rooble.
