Golaha Wasiirraada Xukuumadda Federaalka ayaa isku raacay go’aankii Wasaaradda Arimaha Gudaha Soomaaliya kasoo saartay doorashada Jubbaland oo ahaa inaan la aqoonsan natiijada kasoo baxday doorashadaasi.
Kulankii maanta ee Golaha Wasiirada ayaa looga hadlay Dib u Doorashadii Axmed Madoobe 22-kii ka dhacday magaalada Kismaayo, waxaana Golaha Wasiirada xukuumadda Soomaaliya ay sheegeen inaysan oqoonsaneyn natiijooyinkii kasoo baxay doorashooyinkii aan loo marin habraaca saxda ah ee lagu qabtay Kismaayo.
Golaha Wasiirada Xukuumadda Soomaaliya wuxuu faray Wasaaradda Arrimaha Gudaha inay Golaha horkeento habraac faahfaahsan oo lagu xallinayo xaaladda Jubbaland, si loo badbaadiyo hay’adaha dowliga ah ee Jubaland.
Wasiirka Warfaafinta xukuumadda Somalia Maxamed Cabdi Maareeye ayaa akhriyey go’aanada kasoo baxay Golaha Wasiirada, isagoo sheegay in doorashooyinkii ka dhacay magaalada Kismaayo ay ahaayeen sharci darro oo aan loo marin hab xor iyo xalaal ah.
Go”aankan ayaa soo baxay iyadoo isla maanta Hayadda duulista hawada ee Soomaaliya ay diyaaradaha taga Garoonka magaalada Kismaayo ku amartay inay sii maraan magaalada Muqdisho si loogu hubiyo.
