Xeer Ilaaliyaha Guud ee Qaranka Dr. Axmed Cali Dahir oo ka mida guddiga ay xukuumadu u xil saartay baaritaanka weerarkii lagu dilay Xildhibaan Yuusuf Dirir ayaa faahfaahin ka bixiyay howsha guddiga qabtay iyo meesha wax u marayaan, wuxuuna war uu saxaafadda siiyay ku sheegay inay natijo hordhac ah gaareen.
Shilkan oo 23-kii May ka dhacay Wadada Maka Al-Mukarama, ayuu sheegay xeer ilaaliyuhu in ay ku dhinteen  Xildhibaan Yuusuf Dirir iyo labo qof kale shacab ah, ayna ku dhaawacmeen 6 ruux oo kale oo ciidamo ku jiraan. Waxayna guddiga ilaa iminka qabteen arrimaha soo socda:
= Saddex baabuur oo la qabtay (baabuurkii lagu dilay xildhibaanka, gaari ay wateen ciidamada Milateriga iyo Gaari kale oo ay leeyihiin ciidamada Laanta Socdaalka ee shilka qeyb ku lahaa)
= 14 ruux oo xabsiga la dhigay oo ay ku jiraan ciidamada milateriga ee falka geystay oo qaarkood ay dhaawac yihiin
= Waxaa lala wareegay lix qori oo AK ah iyo qori PKM ah oo ah hubkii falkaasi lagu fuliyay.
Xeer ilaaliyaha guud ayaa sheegay in baaritaanku bilow yahay, ayna jiraan tuhuno hor leh oo kiiska ku xiraya dhinacyo kale balse ay baari doonaan oo natiijada soo baxda la wadaagi doonaan dadka.
Xukuumadda Soomaaliya ayaa guddigan magacawday kadib markii ay wasaaradda amniga soo saartay warsaxaafadeed ay falkaasi dusha uga saartay inay ka danbeeyeen ciidamada milateriga, balse ciidamadaasi ay ku adkeysteen in wixii dhacay uu ahaa shil aanay dembi ku lahayn.
Wadani.com
[ad name=”HTML-1″]
[ad name=”HTML-6″]
