Warbixin: Madaxtooyada Soomaaliya oo mar kale la wareegtay maamulka Baraha Bulshada ee Guddiga Doorashada Heer Federaal (FEIT).
Guddiga Doorashada Heer Federaa ee FEIT ayaa hakiyey Doorashada Kursiga HOP086 oo loo xiray Agaasimihii hore ee NISA Fahad Yaasiin Xaaji, waxaana Baraha bulshada qabsaday qoraalka hakinta Kursiga, iyo qoraallo is burrinaya oo ka danbeeyay.
Qoraalkii koowaad ayaa soo baxay xalay saqdii dhexe kadib, waxaana lagu caddeeyaya in Guddiga Doorashada Heer Federaal ee FIET uu hakiyey doorashada Kursiga HOP086, qoraalka Guddiga FEIT ayaa u qornaa sida soo socota:
“Kadib markii Guddiga Doorashada Heer Federaal ee FIET ay soo gaareen cabashooyin ka yimid Odayaasha iyo Nabddoonada Jufada iska leh Kursiga sumadiisu tahay HOP086 . Waxaa lagu wargelinyaa labada Guddi ee Waqradani ku socoto inay hakiyaan doorashada Kursiga inta laga xalinayo cabashada laga soo gudbiyey..”
Saacad kadib waxaa qoraal jawaab ah soo saaray Guddiga Doorashada Hirshabeelle oo si cad u diiday inuu hakiyo Doorashada Kursiga, isla markaana caddeeyay in jadwalkii Doorashada uu sidiisa yahay, ayna wax kama jiraan tahay warqadda kasoo baxay Guddiga Heer Federaal ee FIET.
Muddo kooban kadib waxaa isla xalay xilli danbe qoraalkii hakinta Doorashada Kursiga HOP086 laga saaray Bogga Facebook ee Guddiga Doorashada Heer Federaal FEIT, iyadoo ay muuqatay in xubnaha maamula Boggaasi oo marar badan kala qeybsamay ay mar la wareegeen kooxo iska horjeeda. Waxaase dhacday in Bogga Guddiga ee Twitter-ka ay saarneyd qoraalka hakinta.
Waxyar kadib waxaa haddana Bogga Facebook ee Guddiga Doorashada Heer Federaal lasoo dhigay Qoraal lagu sheegay in Warqadii hakinta Doorashada kursiga HOP086 ay ahayd been abuur. Kadibna ayna dhici Doorashada u dhici doonto sidii loogu talogalay.
Waxaa ka daba yimid qoraal lagu baahiyay Warbaahinta Dowladda oo lagu sheegay in Boggii Guddiga Doorashada Heer Federaal ku lahaa Facebook lagala wareegay Guddiga, wuxuuna qoraalkaasi u qornaa sidatan:
“Guddiga Doorashada Heer Federaal oo ku wargeliyey Ummadda Soomaaliyeed iyo Caalamkaba in Boggii ay ku lahaayeen Barta Facebook-ga uu galay gacan kale, sidaa daraaddeed intuu gacanta guddigu ku soo noqonayo wixii lagu faafiyo aysan waxba ka jirin”.
Bogga Facebook oo ee Guddiga FEIT oo la sheegay inay markii labaad la wareegtay Madaxtooyada Soomaaliya ayaa ugu danbeyn lagu qoray qoraal lagu taageerayo Kursiga HOP086, waxaana ka mid ahaa qoraalkaasi.
“Guddiga Maamulka Doorashada Heer Dowlad Goboleed Hirshabeelle , Xubnaha Guddiga Hirgelinta Doorashooyinka Heer Federaal kumatala qabashada Doorashada Golaha Shacabka BFS iyo Xubnaha Guddiga Xallinta Khilaafaatka ku matala Hirshabeelle qabashada doorashada Golaha shacabka BFS oo dhamaantood Goobjoog ku ah Goob Doorashada 2aad ee Hirshabeelle Baledwayne waxay cadeynayaan in kursiga sumaddiisu tahay HOP#86 in diwaangalinta guddiga ergada xulista waafaqsanyihiin habraaca Doorashada Dadban isla markaana ay jirin sabab loo hakiyo qabashada kursigaas oo ka mid ah lix kursi oo Golaha Shacabka oo la shaaciyay jadwalkooda Tr 15/02/2022.”
Dagaalka waraaqaha iyo Baraha bulshada ku dhex maray Guddiyada Doorashada Heer Federaal oo Madaxtooyada soo faragelisay, Guddiga Doorashada Hirshabeelle oo saameyn weyn uu ku leeyahay Fahad Yaasiin iyo Xafiiska Ra’iisal wasaaraha oo dagaal kala dhaxeeyo Agaasimihii hore ee NISA, waxay xaaladda ka dhigeen fadeexad iyo wax lagu qoslo sida loo hoggaamimayo Doorashada Dadban ee kalsoonidu kasii dhimaneyso.
Waxaa la sugayaa go’aanka ay qaadan doonaan Madaxda iyo xubnaha Guddiga FEIT iyo sida arrintan ay u arkaan, waxaana la ogyahay xitaa haddii Guddiga FEIT isagoo dhan ka hor yimaado ama hakiyo kursiga HOP086 in Guddiga SEIT ee Hirshabeelle aysan u hoggaansami doonin, sida hore u sameeyaan Guddiga SEIT K/Galbeed.
