Guddiga Doorashada Heer Federal FEIT ayaa go’aan kasoo saaray qabashada Doorashada kuraasta degaan doorashadoodu tahay magaalada Garbahaarey ee Gobolka Gedo.
Qoraal kasoo baxay Guddiga FEIT ayaa lagu go’aamiyey Doorashada 16-ka Kursi ee Gobolka Gedo ay ka dhacdo degmada Ceelwaaq, halkaasoo loo wareejiyay.
Guddiga ayaa qoraalkiisa ku sheegay in magaalada Garbahaarey aysan doorasho ka dhici karin sababtuna ay tahay inay jiraan caqabado amni, Wuxuna maamulka Garbahaareey ku eedeeyey inay diideen xubno ka socda Guddiga Hirgelinta Doorashooyinka ee Heer Federaal ku tagaan booqasho loogu kuur geli lahaa in la soo hubiyo xaaladda Amniga magaalada Garbahaareey.
“Markuu guddiga garwaaqsaday inaysan suuragalahayn inay doorasho ka dhacdo magaalada Garbahaareey waxaa lagama maarmaan u noqotay in meel kale oo dadka u dhaxeyso amnigeeduna sugan yahay la helo. Guddigu waxaa uu go’aamiyey in doorashada garbahaareey laga bedelo laguna bedelo in doorashada lagu qabto Magaalada Ceelwaaq ee gobolka Gedo,” ayaa lagu yiri qoraalka kasoo baxay guddiga.
Go’aanka Guddiga ayaa imanaya ayada oo maanta la dhaariyey inta badan xildhibaanada cusub ee baarlamanka Soomaaliya.
